മോഹൻലാലിനെ നായകനാക്കി ജീത്തു ജോസഫ് ഒരുക്കിയ ചിത്രം നേര് അമ്പതു കോടി ക്ലബിൽ ഇടം പിടിച്ചു. റിലീസ് ചെയ്ത് എട്ടാം ദിവസമാണ് ചിത്രം അമ്പതുകോടി ക്ലബിൽ ഇടം കണ്ടെത്തിയത്. ആഗോളതലത്തിൽ അമ്പതു കോടി രൂപയിലധികമാണ് നേര് ഇത്രയും ദിവസം കൊണ്ട് നേടിയത്. മോഹൻലാൽ തന്നെയാണ് തന്റെ ഔദ്യോഗിക സോഷ്യൽ മീഡിയ അക്കൗണ്ടിലൂടെ അമ്പതു കോടി ക്ലബിൽ എത്തിയ വിവരം സ്ഥിരീകരിച്ചത്. അമ്പതു കോടി ക്ലബിൽ നേര് ഇടം പിടിച്ച സന്തോഷം പങ്കുവെച്ച മോഹൻലാൽ പ്രേക്ഷകർക്ക് നന്ദി അറിയിക്കുകയും ചെയ്തു.
ചെറിയ ബജറ്റിൽ ഒരുങ്ങിയ ചിത്രമായിട്ടും ഈ ചുരുങ്ങിയ ദിവസത്തിനുള്ളിൽ നേര് അമ്പതു കോടി ക്ലബിൽ ഇടം പിടിച്ചത് അണിയറപ്രവർത്തകരെയും ആവേശത്തിലാക്കി. പത്തു വർഷം മുമ്പ് മോഹൻലാലിനെ നായകനാക്കി ജീത്തു ജോസഫ് ഒരുക്കിയ ദൃശ്യം വൻ വിജയമായിരുന്നു. ദൃശ്യം പിറന്ന് പത്തു വർഷത്തിന് ശേഷമാണ് ജീത്തു ജോസഫ് – മോഹൻലാൽ കൂട്ടുകെട്ടിൽ നേര് തിയറ്ററുകളിൽ വൻ വിജയമാകുന്നു എന്നതും ശ്രദ്ധേയമാണ്. ഒരു കോർട്ട് റൂം ഡ്രാമയായാണ് നേര് ഒരുക്കിയിരിക്കുന്നത്. ചിത്രത്തിൽ വിജയമോഹൻ എന്ന അഭിഭാഷക കഥാപാത്രമായാണ് മോഹൻലാൽ എത്തിയത്.
അഭിഭാഷകയും നടിയുമായ ശാന്തി മായാദേവിയും ജീത്തു ജോസഫും ചേർന്നാണ് ചിത്രത്തിന്റെ തിരക്കഥ ഒരുക്കിയത്. പതിമൂന്ന് വര്‍ഷങ്ങള്‍ക്ക് ശേഷം മോഹന്‍ലാല്‍ വക്കീല്‍ വേഷത്തില്‍ എത്തിയ ചിത്രമായിരുന്നു നേര്. സിദ്ദിഖ്, പ്രിയാമണി, ജഗദീഷ്, അനശ്വര രാജൻ, ശാന്തി മായാദേവി, ഗണേഷ് കുമാർ എന്നിവരാണ് ചിത്രത്തിൽ മറ്റ് പ്രധാനപ്പെട്ട കഥാപാത്രങ്ങളെ അവതരിപ്പിക്കുന്നത്. സതീഷ് കുറുപ്പ് ആണ് ചിത്രത്തിന്റെ ഛായാഗ്രഹണം. ‘നീതി തേടുന്നു’ എന്നാണ് ഈ മോഹന്‍ലാല്‍ ചിത്രത്തിന്റെ ടാഗ് ലൈന്‍. വിഷ്ണു ശ്യാം ആണ് ചിത്രത്തിന്റെ സംഗീതസംവിധാനം നിർവഹിച്ചത്.
