കമൽഹാസൻ നായകനായി എത്തിയ ചിത്രമായിരുന്നു അൻപേ ശിവം. ചിത്രം റിലീസ് ചെയ്ത് 20 വർഷങ്ങൾ കഴിഞ്ഞിരിക്കുന്നു. ചിത്രത്തിലെ യാര് യാര് ശിവം എന്ന ഗാനം വർഷങ്ങൾക്ക് ശേഷം ഇപ്പോഴും ജനമനസുകളെ കീഴടക്കി നില കൊള്ളുകയാണ്. മലയാളികൾക്ക് പ്രണയത്തിന്റെയും വിരഹത്തിന്റെയും ഈണങ്ങൾ പകർന്നു നൽകിയ വിദ്യാസാഗർ തന്റെ സംഗീത യാത്രയിൽ 25 വർഷങ്ങൾ പിന്നിടുകയാണ്. ഇതിന്റെ ഭാഗമായി വിദ്യാസാഗർ നൽകിയ ഒരു അഭിമുഖത്തിൽ പറഞ്ഞ വാക്കുകളാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
യാര് യാര് ശിവം എന്ന ഗാനത്തിൽ ദൈവികാംശം ഉണ്ടെന്ന് തനിക്ക് തോന്നുന്നുണ്ടെന്ന് തുറന്നു പറഞ്ഞിരിക്കുകയാണ് വിദ്യാസാഗർ. സില്ലി മോങ്ക്സ് മോളിവുഡിന് നൽകിയ അഭിമുഖത്തിലാണ് വിദ്യാസാഗർ ഇങ്ങനെ പറഞ്ഞത്. യാര് യാര് ശിവം എന്ന ഗാനം സ്റ്റേജിൽ അവതരിപ്പിച്ചപ്പോൾ നടന്ന ദൈവികമായ അനുഭവത്തെക്കുറിച്ചാണ് വിദ്യാസാഗർ ഇങ്ങനെ പറഞ്ഞത്.
ചെന്നെയിൽ നടന്ന വിദ്യാസാഗർ സ്റ്റേജ് ഷോയിൽ അൻപേ ശിവത്തിലെ പാട്ടിന് മുമ്പ് അതാരകൻ കാണികളോട് എല്ലാവരോടും തങ്ങളുടെ ഫോൺ സൈലൻ്റ് ആക്കാൻ ആവശ്യപ്പെട്ടു. പാട്ട് തുടങ്ങിയതും പരിപാടി നടക്കുന്ന സ്ഥലത്തെ താപനില മൂന്ന് നാല് ഡിഗ്രി കുറഞ്ഞതു പോലെ തോന്നി. പതിയെ ഒരു കാറ്റ് മന്ദ മാരുതനെപോലെ സ്റ്റേജിനെ വന്ന് തഴുകി. ആ അനുഭവം മറക്കാനാകില്ലെന്നും സംഗീതം ദൈവികമാണെന്നുമാണ് വിദ്യാസാഗർ അഭിമുഖത്തിൽ പറഞ്ഞത്. ഈസംഭവത്തിന്റെ വീഡിയോ യുട്യൂബിൽ ഉണ്ടെന്നും വിദ്യാസാഗർ പറഞ്ഞു. “സംഗീതത്തിൽ ഞാൻ നേടിയതെല്ലാം ഈശ്വരനുഗ്രഹമാണ്. പാട്ടുകളുടെ വിജയവും പരാജയവും എന്നെ ഒരിക്കലും ബാധിക്കാറില്ല. തമിഴിൽ സ്കൂൾ കാലഘട്ടത്ത് ഞാൻ ഒരു റാങ്ക് ഹോൾഡർ ആയിരുന്നു. ഭാഷയോടുള്ള ഇഷ്ട്ടമാണ് എൻ്റെ പാട്ടുകളിൽ നല്ല വരികൾ വരാനുള്ള കാരണം” – വിദ്യാസാഗർ കൂട്ടിചേർത്തു. മലയാള സിനിമയിൽ 25 വർഷങ്ങൾ പിന്നിട്ട അദ്ദേഹത്തിൻ്റെ ‘ലൈവ് കൺസേർട്ട് ‘ അങ്കമാലിയിലെ അഡ്ലക്സ് ഓഡിറ്റോറിയത്തിൽ ജൂൺ പത്തിന് നടക്കും.
