മികച്ച ഗായികയ്ക്കുള്ള ദേശീയ പുരസ്‌കാരം നഞ്ചിയമ്മയ്ക്ക് നല്‍കിയതില്‍ വിമര്‍ശനവുമായി സംഗീത സംവിധായകന്‍ ലിനു ലാല്‍. അയ്യപ്പനും കോശിയും എന്ന ചിത്രത്തിലെ ഗാനം 2020 ലെ മികച്ച ഗാനമായി തനിക്ക് തോന്നിയിട്ടില്ലെന്ന് ലിനു ലാല്‍ പറഞ്ഞു. സംഗീതത്തിനായി ജീവിതം ഉഴിഞ്ഞുവച്ചവര്‍ക്ക് ഈ അംഗീകാരം അപമാനമായി തോന്നില്ലെയെന്നും ലിനു ലാല്‍ ചോദിച്ചു.
ഇന്ത്യയിലെ ഏറ്റവും നല്ല പാട്ടാണോ നഞ്ചിയമ്മ പാടിയ പാട്ടെന്ന് ലിനു ലാല്‍ ചോദിക്കുന്നു. നഞ്ചിയമ്മയോട് തനിക്ക് യാതൊരു വിരോധവുമില്ല. അവരെ തനിക്ക് ഇഷ്ടമാണ്. ആ ഫോക് സോംഗ് അവര്‍ രസകരമായി പാടിയിട്ടുണ്ട്. തങ്ങളുടെ ഒന്നു രണ്ട് വേദിയില്‍ അവര്‍ വന്നിട്ടുണ്ട്. പിച്ച് ഇട്ടു കൊടുത്താല്‍ അതിന് അനുസരിച്ച് പാടാനൊന്നും കഴിവില്ല. അങ്ങനെയുള്ള ഒരാള്‍ക്കാണോ പുരസ്‌കാരം നല്‍കേണ്ടതെന്നും ലിനു ലാല്‍ ചോദിക്കുന്നു.
പുതിയ ഒരു ഗാനം കംബോസ് ചെയ്ത് നഞ്ചിയമ്മയെ സ്റ്റുഡിയോയിലേക്ക് എത്തിച്ച് പാടിക്കാമെന്നുവച്ചാല്‍ അത് സാദിക്കുമെന്ന് തോന്നുന്നില്ല. ഒരാഴ്ചയോ ഒരു മാസം കൊണ്ടോ അവര്‍ക്കത് പഠിച്ചെടുക്കാന്‍ കഴിയില്ല. ദാസ് സാറൊക്കെ ഒരു ദിവസം എട്ടും പത്തും പാട്ടൊക്കെ പാടിയിട്ടുണ്ട്. അതുപോലെ ഒരുപാട് ഗായകരുണ്ട്. സംഗീതത്തിന് വേണ്ടി ജീവിതം ഉഴിഞ്ഞുവച്ചവര്‍ക്ക് ഇങ്ങനെയൊരു കാര്യം കേള്‍ക്കുമ്പോള്‍ അപമാനമായി തോന്നില്ലേയെന്നും ലിനു ലാല്‍ കൂട്ടിച്ചേര്‍ത്തു.
