മനോഹരമായ ഒരു മെലഡ‍ി ആരാധകർക്ക് സമ്മാനിച്ചിരിക്കുകയാണ് ‘എങ്കിലും ചന്ദ്രികേ’ ടീം. സിനിമയിലെ മുത്തേ ഇന്നെൻ കണ്ണിൽ പുഞ്ചിരി മുത്തുകൾ വിതറണതാരാണ് എന്ന ഗാനത്തിന്റെ ലിറിക്കൽ വീഡിയോ അണിയറപ്രവർത്തകർ പുറത്തിറക്കിയിരിക്കുകയാണ്. വിനായക് ശശികുമാറിന്റെ വരികൾക്ക് ഇഫ്തിയാണ് സംഗീതം നൽകിയിരിക്കുന്നത്.അരവിന്ദ് വേണുഗോപാൽ ആണ് പാട്ട് ആലപിച്ചിരിക്കുന്നത്.
സുരാജ് വെഞ്ഞാറമൂടും ബേസിൽ ജോസഫും പ്രധാന വേഷത്തിൽ എത്തുന്ന ചിത്രത്തിൽ നിരഞ്ജന അനൂപ് ആണ് നായിക. ഫെബ്രുവരി പത്തിന് ചിത്രം തിയറ്ററുകളിൽ റിലീസ് ചെയ്യും. ഒരു കല്യാണവും അതിനെ തുടർന്നുള്ള ചില സംഭവങ്ങളുമാണ് ചിത്രത്തിൻറെ പ്രമേയം എന്നാണ് റിപ്പോർട്ടുകൾ. എങ്കിലും ചന്ദ്രികേ ഒരു മുഴുനീള കോമഡി എന്റെർറ്റൈനെർ ചിത്രമായാണ് ഒരുക്കിയിരിക്കുന്നത്.
ആദിത്യൻ ചന്ദ്രശേഖർ ആണ് ചിത്രം സംവിധാനം ചെയ്യുന്നത്. ചിത്രത്തിൽ സൈജു കുറുപ്പും പ്രധാന വേഷത്തിൽ എത്തുന്നുണ്ട്. ആദിത്യൻ ചന്ദ്രശേഖർ, അർജുൻ നാരായണൻ എന്നിവരാണ് ചിത്രത്തിന്റെ തിരക്കഥ രചിച്ചിരിക്കുന്നത്. ആവറേജ് അമ്പിളി എന്ന വെബ്‌സീരീസ് ആദിത്യൻ തിരക്കഥ എഴുതി സംവിധാനം ചെയ്തിരുന്നു.
