നിരവധി കോമഡി ഷോകളിലും സിനിമകളിലും സഹവേഷങ്ങളിലും അഭിനയിച്ചിട്ടുള്ള ബിനു തൃക്കാക്കര നായകനായി എത്തുന്ന ‘മൈ നെയിം ഈസ് അഴകൻ’ ടീസർ റിലീസ് ചെയ്തു. മലയാളത്തിന്റെ മെഗാസ്റ്റാർ മമ്മൂട്ടിയാണ് ചിത്രത്തിന്റെ ടീസർ റിലീസ് ചെയ്തത്. ബിനു തൃക്കാക്കര, ശരണ്യ രാമചന്ദ്രൻ എന്നിവരെ നായികാനായകൻമാരാക്കി ബി സി നൗഫൽ സംവിധാനം ചെയ്യുന്ന ചിത്രമാണ് ‘മൈ നെയിം ഈസ് അഴകൻ’. ട്രൂത്ത് ഫിലിംസിന്റെ ബാനറിൽ സമദ് ട്രൂത്ത് നിർമ്മിക്കുന്ന ചിത്രം സെപ്തംബർ മാസം തിയറ്ററുകളിലേക്ക് എത്തും.
ഒരു യമണ്ടൻ പ്രേമകഥ എന്ന സിനിമയ്ക്കു ശേഷം ബി സി നൗഫൽ സംവിധാനം ചെയ്യുന്ന ചിത്രമാണ് ‘മൈ നെയിം ഈസ് അഴകൻ’. വിഷ്ണു ഉണ്ണിക്കൃഷ്ണൻ, ബിബിൻ ജോർജ്, ജോണി ആന്റണി, ജോളി ചിറയത്ത്, ടിനിടോം, ജാഫർ ഇടുക്കി, സുധി കോപ്പ, ബൈജു എഴുപുന്ന, കൃഷ്ണ പ്രഭ എന്നിവരാണ് ചിത്രത്തിലെ അഭിനേതാക്കൾ. ചിത്രത്തിന്റെ രചന നിർവഹിച്ചിരിക്കുന്നത് ബിനു തൃക്കാക്കര തന്നെയാണ്. പ്രീസ്റ്റ്, ഭീഷ്മപർവ്വം, സിബിഐ 5, കാവൽ, അജഗജാന്തരം എന്നീ ചിത്രങ്ങളുടെ ഇന്ത്യക്ക് പുറത്തുള്ള ഡിസ്ട്രിബ്യൂഷൻ നിർവ്വഹിച്ചിട്ടുള്ള ട്രൂത്ത് ഫിലിംസ് നിർമ്മിക്കുന്ന ആദ്യ ചിത്രമാണ് ‘മൈ നെയിം ഈസ് അഴകൻ’.
ചിത്രത്തിന്റെ ഛായാഗ്രഹണം ഫൈസൽ അലി ആണ് നിർവഹിച്ചിരിക്കുന്നത്. ബി കെ ഹരിനാരായണൻ, വിനായക് ശശികുമാർ, സന്ദീപ് സുധ എന്നിവരുടെ വരികൾക്ക് ദീപക് ദേവ്, അരുൺ രാജ് എന്നിവരാണ്സംഗീതം നൽകിയിരിക്കുന്നത്. പ്രൊഡക്ഷൻ കൺട്രോളർ ബിജു കടവൂർ, ഫിനാൻസ് കൺട്രോളർ അരീബ് റഹ്മാൻ. പി ആർ ഒ: വൈശാഖ് സി വടക്കേവീട്.
