മലയാളത്തിൽ മാത്രമല്ല അന്താരാഷ്ട്രതലത്തിലും ശ്രദ്ധ നേടി ലിജോ ജോസ് പെല്ലിശ്ശേരിയുടെ ചിത്രം നൻപകൽ നേരത്ത് മയക്കം. ന്യൂയോർക്ക് ടൈംസിന്റെ പട്ടികയിലാണ് മമ്മൂട്ടി ചിത്രം ഇടം സ്വന്തമാക്കിയത്. ന്യൂയോർക്ക് ടൈംസിന്റെ ഈ മാസം കണ്ടിരിക്കേണ്ട അഞ്ചു ചിത്രങ്ങളിൽ ഒന്നാണ് നൻപകൽ നേരത്ത് മയക്കം.
സോ വിറ്റോക് സംവിധാനം ചെയ്ത ജമ്പോ (ഫ്രഞ്ച്), ആൻഡേഴ്സ് എംബ്ലത്തിന്റെ എ ഹ്യൂമൻ പൊസിഷൻ (നോർവീജിയൻ), ആഡം സെഡിയാക്കിന്റെ ഡൊമെസ്റ്റിക്യു (ചെക്ക്), മിച്ച് ജെങ്കിൻസിന്റെ ദി ഷോ (ഇംഗ്ലീഷ്) എന്നീ ചിത്രങ്ങൾക്കൊപ്പമാണ് നൻപകലും പട്ടികയിൽ ഇടം നേടിയിരിക്കുന്നത്.
മമ്മൂട്ടി കമ്പനി ആദ്യമായി നിർമിച്ച ചിത്രമായിരുന്നു നൻപകൽ നേരത്ത് മയക്കം ദുൽഖർ സൽമാന്റെ വേഫെറർ ഫിലിംസ് ആണ് ചിത്രം തിയറ്ററുകളിൽ എത്തിച്ചത് .തേനി ഈശ്വർ ആയിരുന്നു ചിത്രത്തിന്റെ ഛായാഗ്രഹണം. സംവിധായകനായ ലിജോയുടെ കഥയ്ക്ക് എസ് ഹരീഷ് ആയിരുന്നു തിരക്കഥ ഒരുക്കിയത്. രമ്യ പാണ്ഡ്യൻ, അശോകൻ, കൈനകരി തങ്കരാജ്, സുരേഷ് ബാബു, ചേതൻ ജയലാൽ, അശ്വന്ത് അശോക് കുമാർ, രാജേഷ് ശർമ തുടങ്ങിയവരാണ് മറ്റ് പ്രധാന താരങ്ങളെ അവതരിപ്പിച്ചത്.
