മമ്മൂട്ടിയെ നായകനാക്കി വൈശാഖ് സംവിധാനം ചെയ്ത മധുരരാജ തീയറ്ററുകളിലെത്തിയപ്പോള്‍ സിനിമയില്‍ ആരും പെട്ടെന്ന് കാണാത്ത ഫ്രെയിമിലെ ഒരു മൂലയില്‍ നെല്‍സണ്‍ എന്ന ചെറുപ്പക്കാരനുമുണ്ടായിരുന്നു. പക്ഷെ നെല്‍സണെ സിനിമയിലെ ആ ഒരൊറ്റ ഫ്രെയിമില്‍ കണ്ടത് അവന്‍ മാത്രമായിരുന്നു. ആള്‍ക്കൂട്ടത്തില്‍ ഒരാളായാണ് ക്യാമറക്ക് മുന്നില്‍ എത്തിയത് എങ്കിലും തണ്ണീര്‍മത്തന്‍ ദിനങ്ങള്‍ എന്ന ചിത്രത്തില്‍ മെല്‍വിന്‍ എന്ന നല്ലൊരു വേഷത്തിലെത്തി നെല്‍സണ്‍
ശ്രദ്ധിക്കപ്പെട്ടു.
ഇപ്പോഴിതാ മനു വാര്യര്‍ സംവിധാനം ചെയ്ത കുരുതി എന്ന ചിത്രത്തില്‍ റസൂല്‍ എന്ന കഥാപാത്രമായി ശ്രദ്ധേയനായിരിക്കുകയാണ് താരം. തണ്ണീര്‍മത്തന്‍ ദിനങ്ങളില്‍ കോമഡി വേഷത്തിലാണ് താരം എത്തിയതെങ്കില്‍ കുരുതിയിലെത്തുമ്പോള്‍ വളരെ ശക്തമായ,പരുക്കന്‍ വേഷത്തിലാണ് നെല്‍സണ്‍ എത്തിയത്.
മുന്‍നിര താരങ്ങള്‍ക്കൊപ്പം മികച്ച പ്രകടനമാണ് താരം കാഴ്ച വച്ചത്. എന്തായാലും തണ്ണീര്‍മത്തനിലെ വേഷത്തില്‍ നിന്നും തീര്‍ത്തും വ്യത്യസ്തമായ വേഷത്തിന് കൈയ്യടി നല്‍കുകയാണ് പ്രേക്ഷകര്‍. അനിഷ് പിള്ള കഥയെഴുതി മനു വാര്യര്‍ സംവിധാനം ചെയ്ത ചിത്രമാണ് കുരുതി. പൃഥ്വിരാജ്, മാമുക്കോയ, റോഷന്‍ മാത്യു, ശ്രിന്ദ, മുരളി ഗോപി, മണികണ്ഠന്‍, നെല്‍സണ്‍ ഗഫൂര്‍, സാഗര്‍ സൂര്യ, ഷൈന്‍ ടോം ചാക്കോ എന്നിവരാണ് ചിത്രത്തിലെ കഥാപാത്രങ്ങളെ അവതരിപ്പിച്ചിരിക്കുന്നത്. അഭിനന്ദ് രാമാനുജമാണ് ക്യാമറ. എഡിറ്റിങ്ങ് അഖിലേഷ് മോഹനും സംഗീതം ജേക്ക്‌സ് ബിജോയിയുമാണ്. പൃഥ്വിരാജ് പ്രൊഡക്ഷന്റെ ബാനറില്‍ സുപ്രിയ മേനോനാണ് കുരുതി നിര്‍മ്മിച്ചത്.
