മലയാള സിനിമയ്ക്ക് ഹിറ്റുകൾ മാത്രം നൽകി ശീലമുള്ള ഒരു സംവിധായകനാണ് വൈശാഖ്. ഹിറ്റ് ചിത്രങ്ങളായ പോക്കിരി രാജയും പുലിമുരുകനും മധുരരാജയും ഒക്കെ ഒരുക്കിയ വൈശാഖിന്റെ ഏറ്റവും പുതിയതായി റിലീസ് ചെയ്ത ചിത്രമാണ് നൈറ്റ് ഡ്രൈവ്. യുവതാരങ്ങളായ റോഷൻ മാത്യു, അന്ന ബെൻ എന്നിവരെ കേന്ദ്ര കഥാപാത്രങ്ങളായി ഒരുക്കിയ ചിത്രം തിയറ്ററുകളിൽ തരംഗമായി മാറിയിരിക്കുകയാണ്. ഇന്ദ്രജിത്ത് സുകുമാരൻ, കലാഭവൻ ഷാജോൺ എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്.
മാർച്ച് പതിനൊന്നിന് തിയറ്ററുകളിൽ റിലീസ് ചെയ്ത ചിത്രം അടുത്ത വൈശാഖ് ഹിറ്റ് ആയി മാറിയിരിക്കുകയാണ്. അഭിലാഷ് പിള്ളയാണ് ചിത്രത്തിന്റെ തിരക്കഥ. ആൻ മെഗാ മീഡിയയുടെ ബാനറിൽ പ്രിയ വേണു, നീത പിന്റോ എന്നിവർ ചേർന്നാണ് ചിത്രം നിർമിച്ചിരിക്കുന്നത്. ട്വിസ്റ്റുകളാൽ സമ്പന്നമായ ചിത്രം ഒരു രാത്രിയിൽ നടക്കുന്ന കഥയാണ് പറയുന്നത്. ആക്ഷനും കോമഡിയും ഒരുപോലെ ചേർന്നപ്പോൾ ചിത്രം കുടുംബപ്രേക്ഷകർ ഏറ്റെടുക്കുകയായിരുന്നു.
ജോർജ് എന്ന ഊബർ ഡ്രൈവർ ആയി റോഷൻ മാത്യു എത്തുമ്പോൾ റിയ റോയ് എന്ന മാധ്യമപ്രവർത്തക ആയാണ് അന്ന ബെൻ എത്തുന്നത്. ബെന്നി മൂപ്പൻ എന്ന പൊലീസ് കഥാപാത്രമായാണ് ഇന്ദ്രജിത്ത് എത്തുന്നത്. കലാഭവൻ ഷാജോൺ, സിദ്ദിഖ്, രഞ്ജി പണിക്കർ, മുത്തുമണി, കൈലാസ്, സന്തോഷ് കീഴാറ്റൂർ, സുരഭി സന്തോഷ്, ശ്രീവിദ്യ മുല്ലശ്ശേരി, പ്രശാന്ത് അലക്സാണ്ടർ എന്നിവരാണ് ചിത്രത്തിലെ മറ്റ് അഭിനേതാക്കൾ. രഞ്ജിൻ രാജ് ആണ് സംഗീതം.
കേരളത്തിലെ തീയറ്ററുകളിൽ പ്രദർശനത്തിനെത്തി വമ്പൻ വിജയം കുറിച്ച നൈറ്റ് ഡ്രൈവ് ഇന്ന് മുതൽ വിദേശ മലയാളികൾക്കും മനോഹരമായ അനുഭവമേകുവാൻ ഇന്ത്യക്ക് പുറത്ത് റിലീസിന് എത്തുകയാണ്. ജിസിസി, സിംഗപ്പൂർ, ഓസ്‌ട്രേലിയ, യുകെ, യു എ ഇ, യു എസ് എ എന്നിവിടങ്ങളിലെ തിയേറ്റർ ലിസ്റ്റ് ഇപ്പോൾ പുറത്തുവന്നിരിക്കുകയാണ്.
