കഴിഞ്ഞ ദിവസമാണ് ഗായകൻ അരുൺ ഗോപനും ഭാര്യയും നടിയും അവതാരകയുമായ നിമ്മി അരുൺ ഗോപനും ആൺകുഞ്ഞ് പിറന്നത്. സോഷ്യൽ മീഡിയയിൽ ഏറെ സജീവമായ നിമ്മിയും അരുണും തൻ്റെ ജീവിതത്തിലെ പുതിയ വിശേഷം ആരാധകരുമായി പങ്കുവെക്കുകയും ചെയ്തിരുന്നു. നിരവധി ആരാധകരാണ് ആശംസകളുമായി രംഗത്തെത്തിയത്.
ജീവിതത്തിലേക്ക് കുഞ്ഞതിഥി എത്തിയ സന്തോഷം പങ്കുവെച്ചെത്തിയ അരുൺ ഗോപനും നിമ്മിയും ഇപ്പോൾ ജീവിതത്തിൻ്റെ പുതിയ റോളിലേക്ക് കടക്കുകയാണ്. നിമ്മി ഇന്ന് രാവിലെ ഒരു ആൺകുഞ്ഞിന് ജന്മം നൽകി എന്ന് കുറിച്ചുകൊണ്ടായിരുന്നു പുത്തൻ വിശേഷം അരുൺ ഫേസ്ബുക്കിലൂടെ അറിയിച്ചത്. വളരെ ആവേശത്തോടെയാണ് കുഞ്ഞു ജനിച്ച കാര്യം അറിയിക്കുന്നതെന്നും പ്രാർത്ഥനകൾക്കും സ്നേഹത്തിനും ഒരുപാട് നന്ദിയെന്നും അരുണും നിമ്മിയും കുറിച്ചിരുന്നു. പുതിയ യാത്രയ്ക്കായി താനും നിമ്മിയും ഒരുങ്ങുകയാണെന്നും അരുൺ സന്തോഷ വാർത്ത അറിയിച്ചുകൊണ്ട് കുറിച്ചിരുന്നു.
ഒരു കാലത്ത് തരംഗമായി മാറിയ ഐഡിയ സ്റ്റാർ സിംഗർ എന്ന റിയാലിറ്റി ഷോയിലൂടെ എത്തി ഏറെ ശ്രദ്ധ നേടിയ ഗായകനാണ് അരുൺ ഗോപൻ. പിന്നണിയിൽ സജീവമായി മാറിയ ശേഷമാണ് അരുൺ ഗോപൻ നടിയും അവതാരകയുമായ നിമ്മിയെ വിവാഹം ചെയ്തത്. കോഴിക്കോട് സ്വദേശിയാണ് ഡോക്ടർ അരുണ്‍. പിന്നണി ഗാനരംഗത്തും അരുൺ ഇതിനോടകം വ്യക്തി മുദ്ര പതിപ്പിച്ചു കഴിഞ്ഞതാണ്. അവതാരകയായി തിളങ്ങിയ നിമ്മിയുടെ തുടക്കം സൂര്യ ടിവിയിലൂടെയായിരുന്നു. മികച്ച നർത്തകി കൂടിയായ നിമ്മി സീരീയൽ രംഗത്തും സജീവമാണ്.
