തെന്നിന്ത്യൻ സിനിമാലോകത്ത് ചുരുങ്ങിയ സിനിമകൾ കൊണ്ടു തന്നെ തന്റേതായ ഇടം കണ്ടെത്തിയ നടിയാണ് നിത്യ മേനൻ. ഇന്ദു വി എസ് സംവിധാനം ചെയ്ത ആര്‍ട്ടിക്കിള്‍ 19 (1) (എ) ആണ് നിത്യയുടേതായി അവസാനമായി റിലീസ് ചെയ്ത ചിത്രം. ഡിസ്നി പ്ലസ് ഹോട്ട്സ്റ്റാറിലാണ് ചിത്രം റിലീസ് ചെയ്തത്. നിത്യ മേനൻ നായികയായി എത്തിയ ചിത്രത്തിൽ വിജയ് സേതുപതി, ഇന്ദ്രജിത്ത് സുകുമാരൻ എന്നിവരാണ് മറ്റ് പ്രധാനവേഷങ്ങളിൽ എത്തിയത്. ഏതായാലും ചിത്രത്തിന് മികച്ച അഭിപ്രായമാണ് ലഭിച്ചു കൊണ്ടിരിക്കുന്നത്. ചിത്രത്തിന്റെ പ്രമോഷനുമായി ബന്ധപ്പെട്ട് ഒരു അഭിമുഖത്തിന് എത്തിയപ്പോൾ നിത്യ മേനൻ പറഞ്ഞ കാര്യങ്ങളാണ് ഇപ്പോൾ വൈറലാകുന്നത്.
മോഹൻലാൽ നായകനായി എത്തിയ ബി ഉണ്ണിക്കൃഷ്ണൻ ചിത്രമായ ‘ആറാട്ട്’ സിനിമയെക്കുറിച്ച് ‘ലാലേട്ടൻ ആറാടുകയാണ്’ എന്ന് തിയറ്റർ റെസ്പോൺസ് വീഡിയോയിലൂടെ പറഞ്ഞ് സോഷ്യൽമീഡിയയിൽ ശ്രദ്ധ നേടിയ സന്തോഷ് വർക്കിയെന്നയാൾ നിത്യ മേനനെ തനിക്ക് വിവാഹം കഴിക്കണം എന്ന് പറഞ്ഞിരുന്നു. ഇതിനെക്കുറിച്ച് ഇപ്പോൾ പ്രതികരിച്ചിരിക്കുകയാണ് നിത്യ മേനൻ. വർഷങ്ങളായി താൻ നിത്യയോട് ഇക്കാര്യങ്ങൾ സംസാരിച്ച് വരികയാണെന്ന തരത്തിലാണ് സന്തോഷ് വർക്കി മാധ്യമങ്ങളോട് ഇക്കാര്യങ്ങൾ പറഞ്ഞത്. ഇക്കാര്യങ്ങളോട് പ്രതികരിച്ചിരിക്കുകയാണ് നിത്യ മേനൻ. ബിഹൈൻഡ്‌വുഡ്‌സിന് നൽകിയ അഭിമുഖത്തിലാണ് നിത്യ ഇക്കാര്യങ്ങൾ പറഞ്ഞത്.
വർഷങ്ങളായി ഇയാൾ തന്നെ ബുദ്ധിമുട്ടിച്ച് വരികയാണെന്നും കുറേ കഷ്ടപ്പെടുത്തിയെന്നും തന്നെയും തന്റെ മാതാപിതാക്കളെയും ഒരുപാട് ബുദ്ധിമുട്ടിച്ചു എന്നുമാണ് നിത്യ പറയുന്നത്. അയാൾ പറയുന്നത് കേട്ട് അതൊക്കെ വിശ്വസിച്ചാൽ നമ്മളാകും മണ്ടൻമാർ. കുറേ വർഷങ്ങളായി ഒരുപാട് കഷ്ടപ്പെടുത്തിയിട്ടുണ്ട്. അഞ്ചാറ് വർഷങ്ങളായി അയാൾ പിറകെയാണ്. താൻ ആയതുകൊണ്ടാണ് ഇങ്ങനെ ഇരിക്കുന്നതെന്നും ഇതിൽ ഒന്നും ഇടപെടാൻ താൽപര്യമില്ലാത്തത് കൊണ്ടാണെന്നും നിത്യ പറഞ്ഞു. പൊലീസിൽ പരാതി കൊടുക്കാൻ പലരും തന്നോട് പറഞ്ഞിട്ടുണ്ടെന്നും പക്ഷേ ഓരോരുത്തർക്കും ഓരോ ജീവിതമാണല്ലോയെന്നും നിത്യ പറഞ്ഞു. അയാളുടെ തന്നെ 20, 30 നമ്പറുകള്‍ ബ്ലോക്ക് ചെയ്തിട്ടുണ്ടെന്നും എന്റെ ചുറ്റുമുള്ള എല്ലാവരെയും വിളിച്ചിട്ടുണ്ടെന്നും ജീവിതത്തില്‍ ഒരു കീടം പോലെയാണ് അയാളെന്നും നിത്യ പറയുന്നു.
