സോഷ്യല്‍ മീഡിയയില്‍ വൈറലായി നടന്‍ നിവിന്‍ പോളിയുടെ പുതിയ ചിത്രങ്ങള്‍. സൈമ പുരസ്‌കാര വേദിയിലാണ് പുതിയ ഗെറ്റപ്പില്‍ താരമെത്തിയത്. ‘മൂത്തോന്‍’ എന്ന ചിത്രത്തിലെ അഭിനയത്തിന് 2019 ലെ മികച്ച നടനുള്ള (ക്രിട്ടിക്‌സ്‌) പുരസ്‌കാരം സ്വീകരിക്കാനായി എത്തിയതായിരുന്നു നിവിന്‍ പോളി. കറുത്ത കോട്ടും സ്യൂട്ടുമണിഞ്ഞ് താടിയും മുടിയും നീട്ടി വളര്‍ത്തിയ ലുക്കിലാണ് താരം. ഗീതു മോഹന്‍ദാസ് സംവിധാനം ചെയ്ത് നിവിന്‍ പോളി നായകനായെത്തിയ ചിത്രമാണ് ‘മൂത്തോന്‍’. ലയേഴ്സ് ഡയസിന് ശേഷം ഗീതു മോഹന്‍ദാസ് സംവിധാനം ചെയ്യുന്ന ചിത്രമാണിത്. ബോളിവുഡ് സംവിധായകന്‍ അനുരാഗ് കശ്യപാണ് ചിത്രത്തിലെ ഹിന്ദി സംഭാഷണങ്ങള്‍ എഴുതിയത്. മിനി സ്റ്റുഡിയോ, ജാര്‍ പിക്ചേഴ്സ്, പാരഗണ്‍ പിക്ചേഴ്സ് എന്നീ ബാനറുകള്‍ക്കൊപ്പം അനുരാഗ് കശ്യപും ചേര്‍ന്നാണ് ചിത്രം നിര്‍മ്മിച്ചത്.
അതേ സമയം താരം പുതിയ ചിത്രത്തിന് വേണ്ടിയാണ് ഇത്തരത്തില്‍ രൂപം മാറ്റി നടത്തിയതെന്ന് ചര്‍ച്ചകളും സജീവമാണ്. കനകം കാമിനി കലഹം എന്ന ചിത്രത്തിന് വേണ്ടിയാവുമോ അതോ പടവെട്ട് എന്ന ചിത്രത്തിന് വേണ്ടിയോ? പടവെട്ട് എന്ന ചിത്രത്തിന് വേണ്ടി നിവിന്‍ നേരത്തെ നടത്തിയ തയ്യാറെടുപ്പുകള്‍ എല്ലാം വാര്‍ത്തയായിരുന്നു. ആന്‍ഡ്രോയിഡ് കുഞ്ഞപ്പന്‍ വേര്‍ഷന്‍ 5.25 എന്ന ചിത്രത്തിന് ശേഷം രതീഷ് ബാലകൃഷ്ണന്‍ പൊതുവാള്‍ ഒരുക്കുന്ന ‘കനകം കാമിനി കലഹം’ ലിജു കൃഷ്ണയുടെ സംവിധാനത്തിലൊരുങ്ങുന്ന ‘പടവെട്ട്’ രാജീവ് രവിയുടെ ‘തുറമുഖം’ എന്നീ ചിത്രങ്ങളാണ് താരത്തിന്റെതായി പുറത്തു വരാനുള്ളത്.
കഥാപാത്രത്തിനു വേണ്ടി 15 കിലോ ശരീര ഭാരം കൂട്ടിയ ചിത്രങ്ങളും സോഷ്യല്‍ മീഡിയയില്‍ വൈറലായി. പടവെട്ട് എന്ന ചിത്രത്തിലാണ് ഇപ്പോള്‍ താരം അഭിനയിച്ചു കൊണ്ടിരിക്കുന്നത്. തുറമുഖം ആണ് പുറത്തിറങ്ങാനുള്ള മറ്റൊരു ചിത്രം.
