നിവിന്‍ പോളിയെ നായകനാക്കി രാജീവ് രവി സംവിധാനം ചെയ്യുന്ന തുറമുഖം എന്ന ചിത്രത്തിന്റെ ട്രെയിലര്‍ പുറത്തുവിട്ടു. ഏറെ ആക്ഷാംക്ഷ ഉണര്‍ത്തുന്നതാണ് ട്രെയിലര്‍. നിവിന്‍പോളി, അര്‍ജുന്‍ അശോകന്‍, സുദേവ് നായര്‍, ഇന്ദ്രജിത്ത് സുകുമാരന്‍, ജോജു ജോര്‍ജ്, നിമിഷ സജയന്‍, പൂര്‍ണിമ, ദര്‍ശന രാജേന്ദ്രന്‍ ഉള്‍പ്പെടെ ട്രെയിലറിലുണ്ട്. ജൂണ്‍ മൂന്നിനാണ് ചിത്രം തീയറ്ററുകളിലെത്തുന്നത്.
കൊവിഡ് പശ്ചാത്തലത്തില്‍ പലതവണ റിലീസ് നീട്ടിവച്ച ചിത്രമാണ് തുറമുഖം. കൊച്ചിയില്‍ 1962 കാലഘട്ടം വരെ നിലനിന്നിരുന്ന ചാപ്പ തൊഴില്‍ വിഭജന സമ്പ്രദായവും ഇത് അവസാനിപ്പിക്കാന്‍ തൊഴിലാളികള്‍ നടത്തിയ സമരവുമാണ് ചിത്രത്തിന്റെ പ്രധാന പ്രമേയം. കെ എം ചിദംബരത്തിന്റെ നാടകത്തെ ആസ്പദമാക്കുന്ന ചിത്രത്തിന് തിരക്കഥയൊരുക്കിയിരിക്കുന്നത് മകന്‍ ഗോപന്‍ ചിദംബരമാണ്. നേരത്തെ അമല്‍ നീരദ് സംവിധാനം ചെയ്ത ഇയ്യോബിന്റെ പുസ്‌കത്തിന്റെ രചനയും ഗോപന്‍ ചിദംബരം ആയിരുന്നു.
എഡിറ്റിംഗ് ബി അജിത്കുമാറാണ് നിര്‍വഹിച്ചിരിക്കുന്നത്. കലാസംവിധാനം ഗോകുല്‍ദാസും മേക്കപ്പ് റോണക്‌സ് സേവ്യറും നിര്‍വഹിച്ചിരിക്കുന്നു. പ്രൊഡക്ഷന്‍ കണ്‍ട്രോളര്‍ ദീപക് പരമേശ്വരന്‍, പിആര്‍ഒ എ എസ് ദിനേശ്.
