സിനിമയെ നിരൂപണം നടത്തുന്നവർ സിനിമയെക്കുറിച്ചും അത് ഉണ്ടാകുന്ന വഴികളെക്കുറിച്ചും അറിഞ്ഞിരിക്കണം എന്നു പറഞ്ഞ സംവിധായിക അഞ്ജലി മേനോനെ ട്രോളി എഴുത്തുകാരൻ എൻ എസ് മാധവൻ. തന്റെ പുതിയ സിനിമയായ വണ്ടർ വുമണിന്റെ പ്രമോഷനുമായി ബന്ധപ്പെട്ട് അഭിമുഖത്തിൽ സംസാരിക്കുമ്പോഴാണ് അഞ്ജലി മേനോൻ ഇങ്ങനെ പറഞ്ഞത്. ഒരു സിനിമ എങ്ങനെയാണ് സൃഷ്ടിക്കുന്നത് എന്ന പ്രോസസിനെക്കുറിച്ച് പഠിച്ചതിനു ശേഷമാണ് റിവ്യൂ ചെയ്യേണ്ടത് എന്ന രീതിയിലുള്ള അഞ്ജലി മേനോന്റെ വാക്കുകളാണ് വിവാദമായത്. നിരവധി പേരാണ് അഞ്ജലിയുടെ പ്രസ്താവനയെ തള്ളിക്കളഞ്ഞുകൊണ്ട് രംഗത്തു വന്നത്. ഇതിനെതിരെ സോഷ്യൽ മീഡിയയിൽ ട്വീറ്റുമായി രംഗത്തെത്തിയിരിക്കുകയാണ് എൻ എസ് മാധവൻ.
അഞ്ജലി മേനോൻ തട്ടുകടയിൽ പോയി ദോശ ഓർഡർ ചെയ്തു. അവർക്ക് ദോശ ഇഷ്ടപ്പെട്ടില്ല. അവർ ദോശ കൊള്ളില്ലെന്ന് പറഞ്ഞു. എന്നാൽ തട്ടുകടക്കാരൻ, മാഡം, നിങ്ങൾക്ക് അത് പറയാൻ പറ്റില്ലെന്നും ദോശ ഉണ്ടാക്കുന്നതിനെക്കുറിച്ച് നിങ്ങൾക്ക് യാതൊന്നും അറിയില്ലെന്നും പറഞ്ഞു. ഇതാണ് എൻ എസ് മാധവൻ കുറിച്ചത്. ഏതായാലും എൻ എസ് മാധവന്റെ ട്വീറ്റ് ഇപ്പോൾ വൈറലായിരിക്കുകയാണ്.
Anjali Menon goes to a thattukada and orders a dosa.
She doesn’t like it. She says, “yuck!” 🤢
Thattukadawala: “Madam, you can’t say that. You know nothing about dosa making.” pic.twitter.com/ADZATnXdyV— N.S. Madhavan (@NSMlive) November 16, 2022
ഒരു സാധാരണക്കാരനായ പ്രേക്ഷകൻ തന്റെ ദിവസവേതനത്തിൽ നിന്ന് നൂറു ഇരുന്നൂറും രൂപ മിച്ചം പിടിച്ച് ഒരു സിനിമ കാണാൻ പോകുമ്പോൾ ആ സിനിമ കണ്ട ശേഷം അഭിപ്രായം പറയണമെങ്കിൽ സിനിമ പഠിക്കണം എന്ന് പറയുന്നത് ശുദ്ധ വിഡ്ഢിത്തമാണെന്നാണ് ഭൂരിഭാഗം പേരുടെയും അഭിപ്രായം. മഞ്ചാടിക്കുരു, കേരള കഫെയിലെ ഹാപ്പി ജേർണി, ഉസ്താദ് ഹോട്ടൽ, ബാംഗ്ലൂർ ഡേയ്സ്, കൂടെ എന്നീ ജനപ്രിയ സിനിമകൾ ചെയ്ത അഞ്ജലി മേനോന്റെ അടുത്ത ചിത്രമാണ് വണ്ടർ വുമൺ. പാർവതി തിരുവോത്ത്, നിത്യ മെനൻ, നദിയ മൊയ്തു, പദ്മപ്രിയ, സയനോര ഫിലിപ്പ്, അർച്ചന പദ്മിനി, അമൃത സുഭാഷ് എന്നിവരാണ് ചിത്രത്തിൽ പ്രധാന കഥാപാത്രങ്ങളെ കൈകാര്യം ചെയ്യുന്നത്.