പ്രേക്ഷകര്‍ ആകാംക്ഷയോടെ കാത്തിരിക്കുന്ന വിജയ് ചിത്രം ബീസ്റ്റിന്റെ ട്രെയ്‌ലര്‍ പുറത്തിറങ്ങി. വീരരാഘവന്‍ എന്ന സ്‌പൈ ഏജന്റായായണ് വിജയ് എത്തുന്നത്. നഗരത്തിലെ ഒരു ഷോപ്പിംഗ് മാള്‍ പിടിച്ചെടുത്ത് തീവ്രവാദികള്‍ സന്ദര്‍ശകരെ ബന്ദികളാക്കുന്നതും വിജയ് രക്ഷകനാകുന്നതുമാണ് ചിത്രത്തിന്റെ പ്രധാന പ്ലോട്ടെന്നാണ് ട്രെയ്‌ലര്‍ നല്‍കുന്ന സൂചന.
നെല്‍സണ്‍ ദിലീപ് കുമാറാണ് ബീസ്റ്റിന്റെ സംവിധാനം നിര്‍വഹിച്ചിരിക്കുന്നത്. സണ്‍ പിക്‌ചേഴ്‌സ് നിര്‍മിച്ചിരിക്കുന്ന ചിത്രത്തില്‍ പൂജ ഹെഗ്‌ഡെയാണ് നായിക. യോഗി ബാബു, സെല്‍വരാഘവന്‍, റെഡിന്‍ കിംഗ്‌സ്‌ലി, ജോണ്‍ സുറാവു, വിടിവി ഗണേഷ്, അപര്‍ണ ദാസ്, ഷൈന്‍ ടോം ചാക്കോ, ലില്ലിപ്പുട്ട് ഫറൂഖി, അങ്കൂര്‍ അജിത്ത് വികല്‍ തുടങ്ങി വന്‍ താരനിരതന്നെ ചിത്രത്തിലുണ്ട്. മനോജ് പരമഹംസയാണ് ഛായാഗ്രഹണം. എഡിറ്റിംഗ് ആര്‍ നിര്‍മ്മല്‍, കലാസംവിധാനം ഡി ആര്‍ കെ കിരണ്‍, വസ്ത്രാലങ്കാരം വി സായ്, പല്ലവി സിംഗ്, മേക്കപ്പ് പി നടരാജന്‍, വിഎഫ്എക്‌സ് ബിജോയ് അര്‍പ്പുതരാജ്, ഫാന്റം എഫ്എക്‌സ്, സ്റ്റണ്ട് അന്‍പറിവ്, നൃത്തസംവിധാനം ജാനി, ഗോപി പ്രസന്ന.
ഡോക്ടര്‍ എന്ന സൂപ്പര്‍ ഹിറ്റ് ചിത്രത്തിന് ശേഷം നെല്‍സണ്‍ ദിലീപ്കുമാര്‍ സംവിധാനം ചെയ്യുന്ന ചിത്രമാണ് ബീസ്റ്റ്. ചിത്രത്തിലെ ഗാനങ്ങള്‍ക്ക് മികച്ച പ്രതികരണമാണ് ലഭിച്ചത്. ഏപ്രില്‍ 13ന് ചിത്രം തീയറ്ററുകളിലെത്തും.
