ഒമർ ലുലുവിന് പവർസ്റ്റാർ നിർമാതാവ് സമ്മാനമായി കൊടുത്ത പുതിയ മഹീന്ദ്ര ഥാർ;ആ കഥ ഇങ്ങനെ…

അഡാർ ലവ് എന്ന ചിത്രത്തിന് ശേഷം ധമാക്ക എന്ന ചിത്രവുമായി പ്രേക്ഷക മനസ്സിലേക്ക് ഇടം നേടിയ സംവിധായകനാണ് ഒമർ ലുലു. ഒരു പുതിയ ചിത്രം ചിത്രീകരണം ആരംഭിക്കുന്നതിനു മുൻപ് സംവിധായകന് കിടിലൻ സർപ്രൈസ് കൊടുത്തിരിക്കുകയാണ് നിർമ്മാതാവ്. ഒമർ ലുലുവിനാണ് ഈ സർപ്രൈസ് ഗിഫ്റ്റ് കിട്ടിയിരിക്കുന്നത്. ഒരുഅഡാർലവ്, ചങ്ക്സ്, ധമാക്ക എന്ന ചിത്രങ്ങൾക്കുശേഷം ഒമർ ലുലു സംവിധാനം ചെയ്യുന്ന ചിത്രമാണ് പവർ സ്റ്റാർ. ചിത്രത്തിന്റെ നിർമാതാവായ രതീഷ് ആനേടത്താണ് ഒമർ ലുലുവിന് മഹിന്ദ്ര പുറത്തിറക്കിയ ഥാറിന്റെ പുതിയ മോഡൽ വാഹനം സമ്മാനിച്ചിരിക്കുന്നത്.

ഒമർ ലുലുവിന്റെ വാക്കുകൾ:

ബാബു ആന്റണി, റിയാസ് ഖാൻ തുടങ്ങി ഹോളിവുഡ് നടന്മാരെ വരെ അണിയിച്ചൊരുക്കിയാണ് ഈ സിനിമ സംവിധാനം ചെയ്യാനൊരുങ്ങുന്നത്. സൂപ്പർ ഹിറ്റ് തിരക്കഥാകൃത്ത് ‍ഡെന്നീസ് ജോസഫാണ് തിരക്കഥ. വിർച്വൽ ഫിലിംസിന്റെ ബാനറിൽ രതീഷ് ആനേടത്താണ് നിർമാണം. രതീഷാണ് ഇപ്പോൾ മഹിന്ദ്രയുടെ ഥാർ എനിക്ക് സമ്മാനമായി നൽകിയികരിക്കുന്നത്. ഡീസൽ മാനുവൽ മോഡലിലുള്ള വണ്ടിയാണ്. ഹാർഡ് ടോപ് മോഡലാണ്. ഫ്രണ്ടിലേക്ക് അഭിമുഖീകരിച്ചിട്ടുള്ള ഫോർ സീറ്ററാണ്. തൃശൂരുള്ള ഹിറ മോട്ടോർസിൽ നിന്നാണ് വണ്ടി ഏറ്റുവാങ്ങിയത്. ഏറ്റവും വലിയ അതിശയം എന്തെന്നാൽ സിനിമയുടെ ഷൂട്ടിങ് പോലും തുടങ്ങും മുമ്പ് ഇങ്ങനെ‌യൊരു സമ്മാനം എനിക്ക് നൽകി എന്നതാണ്.
ഈ ഥാർ വണ്ടി കണ്ട് എനിക്ക് ഇഷ്ടമായി എന്ന് പറഞ്ഞിരുന്നു. അപ്പോൾ അദ്ദേഹം സന്തോഷത്തോടെ ഒരു സമ്മാനമായി തന്നതാണ്. ഇപ്പോൾ എനിക്ക് കൂടുതൽ ടെൻഷനായി, അത്ര നല്ല ഔട്പുട്ട് കൊടുക്കണമല്ലോ. ഡെന്നീസ് ജോസഫ് സറിന്റെയും ഒരു തിരിച്ചുവരവാണ് ഈ സിനിമ. ഇതുവരെ ചെയ്ത പോലെയുള്ള സിനിമ അല്ല. പൂർണമായും ആക്ഷൻ മാസ് ത്രില്ലർ ആണ്, പാട്ടോ നായികയോ ഒന്നുമില്ല. നിർമാതാവ് രതീഷ് ചേട്ടൻ ദുബായിൽ ഫോറക്സ് ട്രേഡറാണ്. അദ്ദേഹം ഇപ്പോൾ ഗൾഫിലാണ്. ഹിറാ മോട്ടോർസിൽ പോയി എക്സിക്യൂട്ടിവിനെ കാണാൻ എന്നെ വിളിച്ചു പറയുകയായിരുന്നു. അവിടെ ചെന്നപ്പോഴാണ് എനിക്കാണ് വണ്ടി പറഞ്ഞ് വച്ചിരിക്കുന്നതെന്ന് അറിയുന്നത്.
കോവിഡ് കാരണം സിനിമയുടെ ഷൂട്ടിങ് നീട്ടി വച്ചിരിക്കുകയാണ്. ഒക്ടോബറിലാണ് തുടങ്ങാൻ തീരുമാനിച്ചിരുന്നത്. ഇനിയിപ്പോൾ അടുത്ത വർഷം ജനുവരിയോടെ തുടങ്ങാമെന്ന് വിചാരിക്കുന്നു. കോവിഡ് കാലത്ത് ബോറടി മാറ്റാനാണ് സോഷ്യൽ മീഡിയ ഉപയോഗിക്കുന്നത്. ആളുകളുമായി ഇടപഴകുമ്പോൾ കുറച്ച് സമയം പോയികിട്ടുമല്ലോ.