ഹാപ്പി വെഡിങ്ങ്, ചങ്ക്സ്, ഒരു അഡാര്‍ ലൗ, ധമാക്ക തുടങ്ങിയ ചിത്രങ്ങളിലൂടെ പ്രേക്ഷകരുടെ പള്‍സറിഞ്ഞ് സന്തോഷിപ്പിക്കുന്ന ഒമര്‍ ലുലു തന്റെ പുതിയ ചിത്രമായ നല്ല സമയത്തിന്റെ റിലീസിങ്ങിന് ഒരുങ്ങുകയാണ്. ഇർഷാദ് നായകനായ എത്തുന്ന ചിത്രം ഒരു രാത്രിയിൽ നടക്കുന്ന കാര്യങ്ങളാണ് പറയുന്നത്. ഈ ചിത്രത്തിലൂടെ നാല് പുതുമുഖ നായികമാരെയാണ് ഒമർ ലുലു അവതരിപ്പിക്കുന്നത്. നീന മധു, നോറ ജോണ്‍, നന്ദന സഹദേവന്‍, ഗായത്രി ശങ്കര്‍ എന്നിവരാണ് ഈ ചിത്രത്തിലൂടെ അഭിനയ രംഗത്തേക്ക് കടന്ന് വരുന്നത്.
അതേ സമയം കഴിഞ്ഞ ദിവസം നടന്ന ഐ സി സി ട്വന്റി ട്വന്റി വേൾഡ് കപ്പിൽ പാകിസ്ഥാൻ ജയിക്കുമെന്ന് പറഞ്ഞ് ഒമർ ലുലു ഒരു പോസ്റ്റ് പങ്ക് വെച്ചിരുന്നു. എന്നാൽ നിധിൻ നാരായണൻ എന്ന ഒരു ഫോളോവർ ഇംഗ്ലണ്ട് ജയിക്കും.. ധൈര്യമുണ്ടെങ്കിൽ അഞ്ച് ലക്ഷത്തിന് ബെറ്റ് വെക്കുന്നുണ്ടോ എന്ന് ആ പോസ്റ്റിൽ കമന്റ് ഇട്ടിരുന്നു. അതിന് ഒമർ ലുലു സമ്മതം പ്രകടിപ്പിക്കുകയും ചെയ്‌തു. ഇംഗ്ലണ്ട് ജയിച്ചതോടെ നിധിന് അഞ്ച് ലക്ഷം കൊടുക്കണമെന്ന് കമന്റുകൾ വരുവാനും തുടങ്ങി.
ഇപ്പോഴിതാ കോഴിക്കോട് പോയി നിധിനെ നേരിട്ട് കണ്ടിരിക്കുകയാണ് സംവിധായകൻ ഒമർ ലുലു. അപ്പോഴും ആരാധകർക്ക് സംശയം അഞ്ച് ലക്ഷം ഒമർ ലുലു നിധിന് കൊടുക്കുമോ എന്നാണ്. വെറും ചായയിൽ അഞ്ച് ലക്ഷം ഒതുക്കിയോ എന്നൊക്കെയാണ് പ്രേക്ഷകരുടെ ചോദ്യങ്ങൾ. നിതിനുമൊപ്പമുള്ള ഒരു വീഡിയോ പങ്ക് വച്ച സംവിധായകൻ അതിൽ അവർ ഇരുവർക്കും നല്ല സമയമാണെന്ന് പറയുകയും അഞ്ച് ലക്ഷത്തിന്റെ കാര്യം രണ്ടു പേരോടും കൂടി മണ്ണിൽ അലിഞ്ഞ് ഇല്ലാതാവുകയും ചെയ്യുമെന്ന് വ്യക്തമാക്കി.
