മലയാളത്തിന്റെ പ്രിയതാരം കുഞ്ചാക്കോ ബോബനും തെന്നിന്ത്യൻ താരം അരവിന്ദ് സ്വാമിയും പ്രധാനവേഷങ്ങളിൽ എത്തുന്ന ചിത്രമാണ് ഒറ്റ്. ദ്വിഭാഷാ ചിത്രമായ ഒറ്റിന്റെ മോഷൻ പോസ്റ്റർ റിലീസ് ചെയ്തു. തമിഴിൽ രണ്ടകം എന്നാണ് ചിത്രം റിലീസ് ചെയ്യുന്നത്. ടി പി ഫെല്ലിനിയാണ് ചിത്രത്തിന്റെ സംവിധാനം. ചിത്രത്തിൽ വളരെ വ്യത്യസ്തമായ ലുക്കിലാണ് കുഞ്ചാക്കോ ബോബൻ എത്തുന്നത്. മോഷൻ പോസ്റ്ററിൽ നിറയെ ആയുധങ്ങളാണ് കാണാൻ കഴിയുന്നത്. പ്രേക്ഷകർ വളരെ പ്രതീക്ഷയോടെയാണ് മോഷൻ പോസ്റ്റർ ഏറ്റെടുത്തിരിക്കുന്നത്. സെപ്റ്റംബർ രണ്ടിനാണ് ചിത്രം റിലീസ് ചെയ്യുന്നത്.
കാൽ നൂറ്റാണ്ടിനു ശേഷം അരവിന്ദ് സ്വാമി മലയാളത്തിലേക്ക് എത്തുന്ന ചിത്രമെന്ന നിലയില്‍ പ്രഖ്യാപന വേളയില്‍ തന്നെ ‘ഒറ്റ്’ വലിയ പ്രേക്ഷക ശ്രദ്ധ പിടിച്ചുപറ്റിയിരുന്നു. വളരെ ശക്തമായ ഒരു കഥാപാത്രത്തെയാണ് ഒറ്റ് എന്ന ചിത്രത്തിൽ അരവിന്ദ് സ്വാമി അവതരിപ്പിക്കുന്നത്. ജാക്കി ഷ്‌റോഫ് ആണ് ചിത്രത്തിലെ മറ്റൊരു പ്രധാനതാരം. ഒറ്റിലെ പ്രണയഗാനം നേരത്തെ തന്നെ ശ്രദ്ധിക്കപ്പെട്ടിരുന്നു. വാലന്റൈൻ ദിനത്തിൽ ആയിരുന്നു ചിത്രത്തിലെ ആദ്യ പ്രണയഗാനം റിലീസ് ചെയ്തത്. തമിഴിലും മലയാളത്തിലും വീഡിയോ ഗാനം റിലീസ് ചെയ്തിരുന്നു. ‘ഒരേ നോക്കിൽ’ എന്ന് തുടങ്ങുന്ന മലയാളം ഗാനത്തിന്റെ വരികൾ വിനായക് ശശികുമാർ രചിച്ചപ്പോൾ ‘ഒരേ പാർവയി’ എന്ന് തുടങ്ങുന്ന തമിഴ് ഗാനത്തിന്റെ വരികൾ മോഹൻ രാജ് ആണ് രചിച്ചത്. എ എച്ച് ഖാസിഫ് ആണ് സംഗീതം നൽകിയിയത്.
ത്രില്ലര്‍ പശ്ചാത്തലത്തില്‍ ഒരുങ്ങുന്ന ചിത്രത്തിന്റെ തിരക്കഥ ഒരുക്കുന്നത് എസ് സജീവാണ്. തമിഴിലെയും മലയാളത്തിലെയും പ്രമുഖ താരങ്ങള്‍ ചിത്രത്തിന്റെ ഭാഗമാവുന്നതായാണ് റിപ്പോര്‍ട്ട്. തെലുങ്ക് താരം ഈഷ റെബ്ബയാണ് ചിത്രത്തിലെ നായികയായി എത്തുന്നത്. ദി ഷോ പീപ്പിള്‍ ന്റെ ബാനറില്‍ തമിഴ് താരം ആര്യയും ഓഗസ്റ്റ് സിനിമാസിന്റെ ബാനറില്‍ ഷാജി നടേശനും ചേര്‍ന്നാണ് ചിത്രം നിര്‍മ്മിക്കുന്നത്.
