മലയാളികളുടെ പ്രിയ യുവതാരമായ മാത്യു തോമസ്, തെന്നിന്ത്യൻ താരം മാളവിക മോഹൻ എന്നിവർ പ്രധാനവേഷങ്ങളിൽ എത്തുന്ന ചിത്രമാണ് ക്രിസ്റ്റി. ചിത്രത്തിലെ പൂവാർ സോംഗ് കഴിഞ്ഞ ദിവസം റിലീസ് ചെയ്തിരുന്നു. രണ്ടു ദിവസം കൊണ്ട് രണ്ട് മില്യണിൽ അധികം ആളുകളാണ് പാട്ട് യുട്യൂബിൽ കണ്ടത്. ഇതിനകം തന്നെ യുട്യൂബ് ട്രെൻഡിംഗ് ലിസ്റ്റിൽ പാട്ട് ഇടം പിടിച്ചു കഴിഞ്ഞു. വിനായക് ശശികുമാർ എഴുതി ഗോവിന്ദ് വസന്ത സംഗീതം നൽകിയ ഗാനമാണ് റിലീസ് ചെയ്തിരിക്കുന്നത്. വീഡിയോ ഗാനമാണ് റിലീസ് ചെയ്തിരിക്കുന്നത്. ഗോവിന്ദ് വസന്ത തന്നെയാണ് ഗാനം ആലപിച്ചിരിക്കുന്നത്.
ആൽവിൻ ഹെൻറിയാണ് ക്രിസ്റ്റിയുടെ കഥയും സംവിധാനവും. തന്റെ സിനിമയിലെ സ്വന്തം നാടിനെ ഉൾപ്പെടുത്തിയ ആൽവിനെ അഭിനന്ദിച്ച് നിരവധി നാട്ടുകാരാണ് കമന്റ് ബോക്സിൽ എത്തിയിരിക്കുന്നത്. സ്വന്തം നാടിനെ മറക്കാത്ത സംവിധായകൻ ഇനിയും ഉയരങ്ങളിൽ ചെല്ലട്ടെയെന്നും സംവിധായകന് ഒരു കുതിരപ്പവൻ എന്നുമൊക്കെയാണ് ആരാധകർ കുറിക്കുന്നത്. ആൽവിന്റെ കഥയ്ക്ക് തിരക്കഥ ഒരുക്കുന്നത് എഴുത്തുകാരായ ബെന്യാമിനും ജി.ആർ ഇന്ദുഗോപനുമാണ്.
റോക്കി മൗണ്ടെയ്ൻ സിനിമാസിന്റെ ബാനറിൽ സാജെയ് സെബാസ്റ്റിനും കണ്ണൻ സതീശനും ചേർന്നാണ് ചിത്രം നിർമിച്ചിരിക്കുന്നത്. ഗോവിന്ദ് വസന്തയാണ് ചിത്രം ഗാനങ്ങൾ ഒരുക്കുന്നത്. ആനന്ദ് സി ചന്ദ്രൻ ക്യാമറ ചെയ്തിരിക്കുന്നത്. മനു അന്റണിയാണ് ക്രിസ്റ്റിയുടെ എഡിറ്റർ. സെൻട്രൽ പിക്ചേഴ്സാണ് ചിത്രം തിയറ്ററുകളിൽ എത്തിക്കുന്നത്.
