പേരു പോലെ തന്നെ ലളിതവും സുന്ദരവുമാണ് അനിയത്തിയെ നായികയാക്കി മധു വാര്യർ സംവിധാനം ചെയ്ത ലളിതം സുന്ദരം. മധു വാര്യർ ആദ്യമായി സംവിധാനം ചെയ്ത ചിത്രം കൂടിയാണ് ഇത്. ഒരു ഇടവേളയ്ക്കു ശേഷം മഞ്ജു വാര്യരും ബിജു മേനോനും ഒരുമിച്ച് ചേർന്നപ്പോൾ മലയാള സിനിമയ്ക്ക് ലഭിച്ചത് സാഹോദര്യം ആഘോഷമാക്കിയ ഒരു ചിത്രം. സഹോദരങ്ങൾ തമ്മിൽ വഴക്കുകൾ പതിവാണ്. എന്നാൽ, ‘നമ്മളൊക്കെ വഴക്ക് അടിക്കണം, എന്നാൽ അതിനേക്കാൾ ഇരട്ടിയായി സ്നേഹിക്കണം’ എന്ന സന്ദേശമാണ് സിനിമ നൽകുന്നത്. കുടുംബബന്ധങ്ങൾക്ക് വിള്ളലേറ്റു കൊണ്ടിരിക്കുന്ന കാലത്ത് കുടുംബത്തിന് ഒരുമിച്ച് ഇരുന്ന് കാണാൻ പറ്റിയ ചിത്രമാണ് ലളിതം സുന്ദരം. ഡിസ്നി പ്ലസ് ഹോട്ട് സ്റ്റാറിൽ ആണ് ചിത്രം സ്ട്രീമിംഗ് ആരംഭിച്ചു.
സോഷ്യൽ മീഡിയയിലും ചിത്രത്തിന് മികച്ച പ്രതികരണമാണ് ലഭിച്ചിരിക്കുന്നത്. മൂന്ന് സഹോദരങ്ങൾക്കിടയിലെ ശീതയുദ്ധങ്ങളും പിണക്കങ്ങളും ഇണക്കങ്ങളും സ്നേഹവുമൊക്കെയാണ് ചിത്രം പറയുന്നത്. ഉള്ളു തൊടുന്ന ചില മുഹൂർത്തങ്ങളും അഭിനേതാക്കളുടെ പ്രകടനവുമൊക്കെ കൊണ്ട് മൊത്തത്തിൽ രസകരമായ ഒരു കാഴ്ചാനുഭവമാണ് ‘ലളിതം സുന്ദരം’ സമ്മാനിക്കുന്നത് എന്നാണ് സോഷ്യൽ മീഡിയയിൽ ഷെബിൻ ജോസഫ് എന്ന ഒരു പ്രേക്ഷകൻ കുറിച്ചത്. മധു വാര്യരെയും പ്രേക്ഷകർ അഭിനന്ദനം കൊണ്ട് മൂടി.
മഞ്ജു വാര്യർ, ബിജു മേനോൻ, സൈജു കുറുപ്പ്, ദീപ്തി സതി, അനു മോഹൻ, സറീന വഹാബ്, രഘുനാഥ് പലേരി, വിനോദ് തോമസ്, ആശാ അരവിന്ദ്, അഞ്ജന അപ്പുക്കുട്ടന്‍, മാസ്റ്റര്‍ അശ്വിന്‍ വാര്യര്‍, ബേബി തെന്നല്‍ അഭിലാഷ് എന്നിവരാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നത്. മലയാളത്തിലെ പ്രശസ്ത നിർമാണ ബാനർ ആയ സെഞ്ച്വറിയും മഞ്ജു വാര്യർ പ്രൊഡക്ഷൻസും ചേർന്നാണ് ചിത്രം നിർമിച്ചത്. പ്രമോദ് മോഹൻ ആണ് ചിത്രത്തിന്റെ രചന. പി സുകുമാർ, ഗൗതം ശങ്കർ എന്നിവരാണ് ഛായാഗ്രഹണം. ലിജോ പോൾ ആണ് എഡിറ്റിംഗ്.
