ദിലീഷ് പോത്തന്‍, മാത്യു തോമസ്, അജു വര്‍ഗീസ്, സൈജു കുറുപ്പ്, ധ്യാന്‍ ശ്രീനിവാസന്‍ എന്നിവരെ കേന്ദ്രകഥാപാത്രങ്ങളാക്കി ഷഹദ് സംവിധാനം ചെയ്ത ചിത്രമാണ് ‘പ്രകാശന്‍ പറക്കട്ടെ’. ധ്യാന്‍ ശ്രീനിവാസനാണ് ചിത്രത്തിന്റെ കഥയും തിരക്കഥയും സംഭാഷണവും ഒരുക്കിയിരിക്കുന്നത്. ജൂണ്‍ പതിനേഴിന് റിലീസ് ചെയ്ത ചിത്രം മികച്ച പ്രേക്ഷക പ്രതികരണവുമായി മുന്നേറുകയാണ്.
ചിത്രം രണ്ടാം വാരത്തിലേക്ക് കടന്നതിന്റെ സന്തോഷം പങ്കുവയ്ക്കുകയാണ് ധ്യാന്‍ ശ്രീനിവാസന്‍. അറുപതിലേറെ തീയറ്ററുകളിലാണ് ചിത്രത്തിന്റെ പ്രദര്‍ശനം തുടരുന്നത്. പ്രകാശന്‍ രണ്ടാം വാരത്തിലേക്ക് പറന്നുയരുന്നു എന്ന് പറഞ്ഞുകൊണ്ട് ഫേസ്ബുക്കിലാണ് ധ്യാന്‍ പോസ്റ്റ് പങ്കുവച്ചിരിക്കുന്നത്. നിരവധി പേര്‍ പോസ്റ്റിന് താഴെ ആശംസകളുമായി എത്തി.
പുതുമുഖം മാളവിക മനോജാണ് ചിത്രത്തില്‍ നായികയാകുന്നത്. ശ്രീജിത്ത് രവി, ഗോവിന്ദ് വി. പൈ, നിഷാ സാരംഗ്, സ്മിനു സിജോ തുടങ്ങിയവര്‍ക്കൊപ്പം നടന്‍ ശ്രീജിത്ത് രവിയുടെ മകന്‍ മാസ്റ്റര്‍ ഋതുണ്‍ ജയ് ശ്രീജിത്ത് രവിയും ഈ ചിത്രത്തില്‍ അഭിനയിക്കുന്നുണ്ട്. ഹിറ്റ് മേക്കേഴ്‌സ് എന്റര്‍ടെയ്‌മെന്റ്, ഫന്റാസ്റ്റിക് ഫിലിംസ് എന്നീ ബാനറില്‍ വിശാഖ് സുബ്രഹ്‌മണ്യം, ടിനു തോമസ്, അജു വര്‍ഗീസ് എന്നിവര്‍ ചേര്‍ന്നാണ് പ്രകാശന്‍ പറക്കട്ടെ നിര്‍മിച്ചിരിക്കുന്നത്. മനു മഞ്ജിത്തിന്റെയും, ആഗ ഹരി നാരായണന്റെയും വരികള്‍ക്ക് ഷാന്‍ റഹ്‌മാനാണ് സംഗീതം പകര്‍ന്നിരിക്കുന്നത്. ചായാഗ്രഹണം ഗുരുപ്രസാദും എഡിറ്റിംഗ് രതിന്‍ രാധാകൃഷ്ണനും നിര്‍വഹിച്ചിരിക്കുന്നു.
