“ഞാൻ ഒരു മോശം സംവിധായകനും നടനുമായത് കൊണ്ടായിരിക്കും എന്നെ വിളിക്കാതിരുന്നത്” തുറന്നടിച്ച് പ്രതാപ് പോത്തൻ

എൺപതുകളിലെ താരങ്ങളുടെ കൂട്ടായ്‌മയാണ്‌ രണ്ടു ദിവസമായി സോഷ്യൽ മീഡിയ നിറഞ്ഞു നിൽക്കുന്നത്. 80കളിലും ഇപ്പോഴും തിളങ്ങിനില്‍ക്കുന്ന താരങ്ങളുടെ ഗെറ്റ് ടുഗെദറിന്റെ ചിത്രങ്ങള്‍ സോഷ്യല്‍ മീഡിയയിലെല്ലാം തരംഗമായി മാറിയിരുന്നു. തെലുങ്ക് മെഗാസ്റ്റാര്‍ ചിരഞ്ജീവിയുടെ പുതിയ വീട്ടിലായിരുന്നു എല്ലാവരും ഒത്തുച്ചേര്‍ന്നത്. ചിരഞ്ജീവിക്കൊപ്പമുളള ഒരു ചിത്രം മോഹന്‍ലാല്‍ തന്നെ തന്റെ ഫേസ്ബുക്ക് പേജിലൂടെ പങ്കുവെച്ചിരുന്നു. എയ്റ്റീസ് ക്ലബിന്റെ പത്താമത് കൂടിച്ചേരല്‍ കൂടിയായിരുന്നു കഴിഞ്ഞ ദിവസം നടന്നത്. ഈ വര്‍ഷത്തെ ഗെറ്റ് ടുഗെദറില്‍ മോഹന്‍ലാലിനും ചിരഞ്ജീവിക്കും പുറമെ നാഗാര്‍ജുന, ജയറാം, പ്രഭു, റഹ്മാന്‍,ശരത്കുമാര്‍, രാധിക, രേവതി, സുഹാസിനി, ലിസ്സി, അംബിക, പാര്‍വതി, മേനക സുരേഷ് കുമാര്‍, ജയപ്രദ, ശോഭന, ജഗപതി, ബാബു, വെങ്കിടേഷ് തുടങ്ങി നിരവധി താരങ്ങള്‍ പങ്കെടുത്തിരുന്നു.

ആ കൂട്ടായ്‌മയിലേക്ക് തന്നെ ക്ഷണിച്ചില്ലെന്ന പരാതിയുമായി എത്തിയിരിക്കുകയാണ് നടനും സംവിധായകനുമായ പ്രതാപ് പോത്തൻ. താൻ ഒരു നല്ല നടനും സംവിധായകനും അല്ലാതിരുന്നത് കൊണ്ടായിരിക്കും തന്നെ വിളിക്കാതിരുന്നത് എന്ന് പ്രതാപ് പോത്തൻ ഫേസ്ബുക്കിൽ കുറിച്ചു. വിളിക്കാതിരുന്നതിൽ വളരെയേറെ സങ്കടമുണ്ടെന്നും തന്റെ സിനിമ കരിയറിന് യാതൊരു വിലയുമില്ല എന്നും അദ്ദേഹം കൂട്ടിച്ചേർത്തു. ചിലർ ഇഷ്ടപ്പെടുമ്പോൾ മറ്റു ചിലർ വെറുക്കുമെന്നും പറഞ്ഞ അദ്ദേഹം ജീവിതം മുൻപോട്ട് തന്നെ പോകുമെന്നും പറഞ്ഞു. അതോടൊപ്പം തന്നെ എൺപതുകളിലെ ഒരു ഗാനം പങ്ക് വെച്ച് താൻ എൺപതുകളിൽ ഉറങ്ങുകയായിരുന്നു എന്ന് ഒരു പോസ്റ്റും അദ്ദേഹം ഫേസ്ബുക്കിൽ പങ്ക് വെച്ചിട്ടുണ്ട്.