നടൻ പൃഥ്വിരാജ് സുകുമാരൻ പ്രധാന കഥാപാത്രമായി എത്തുന്ന പുതിയ ചിത്രത്തിന്റെ ഫസ്റ്റ് ലുക്ക് പോസ്റ്റർ എത്തി. പൃഥ്വിരാജിന് ഒപ്പം ഇന്ദ്രജിത്ത്, വിജയ് ബാബു എന്നിവർ പ്രധാന വേഷങ്ങളിൽ എത്തുന്ന ‘തീർപ്പ്’ സിനിമയുടെ ഫസ്റ്റ്ലുക്ക് പോസ്റ്ററാണ് കഴിഞ്ഞദിവസം പുറത്തിറക്കിയത്. ‘വിധി തീർപ്പിലും പക തീർപ്പിലും ഒരുപോലെ കുടിയേറിയ ഇരുതലയുള്ള ആ ഒറ്റവാക്ക്, തീർപ്പ്…’ എന്നതാണ് ചിത്രത്തിന്റെ ടാഗ് ലൈൻ.
ഫസ്റ്റ് ലുക്ക് പോസ്റ്ററിൽ തോക്കുമായി നിൽക്കുന്ന പൃഥ്വിയും പിന്നിലായി സിദ്ദിഖിനെയും ഇന്ദ്രജിത്തിനെയും പോസ്റ്ററിൽ കാണാം. വിജയ് ബാബു, സൈജു കുറുപ്പ് എന്നിവരെയും പോസ്റ്ററിൽ കാണാം. ഇഷ തൽവാർ, ഹന്ന റെജി കോശി എന്നിവരാണ് പോസ്റ്ററിൽ മുഖമുള്ള മറ്റ് താരങ്ങൾ. ഫ്രൈഡേ ഫിലിം ഹൗസിന്റെ ബാനറിൽ വിജയ് ബാബു ആണ് ചിത്രത്തിന്റെ നിർമാണം.
കമ്മാരസംഭവത്തിനു ശേഷം മുരളി ഗോപിയുടെ തിരക്കഥയിൽ രതീഷ് അമ്പാട്ട് സംവിധാനം ചെയ്യുന്ന ചിത്രമാണ് തീർപ്പ്. ‘ഹോം’ എന്ന സിനിമയ്ക്ക് ശേഷം ഫ്രൈഡേയുടെ ബാനറിൽ റിലീസിന് ഒരുങ്ങുന്ന ചിത്രം കൂടിയാണ് ഇത്. മുരളി ഗോപി തന്നെയാണ് ഗാനരചനയും സംഗീതസംവിധാനവും. സുനിൽ കെ എസ് ആണ് ഛായാഗ്രഹണം. പശ്ചാത്തലസംഗീതം ഒരുക്കുന്നത് ഗോപി സുന്ദറാണ്. സിനിമയുടെ റിലീസ് തീയതി വരും ദിവസങ്ങളിൽ പ്രഖ്യാപിക്കും. കോവിഡ് പ്രോട്ടോക്കോളുകൾ പാലിച്ച് 48 ദിവസം കൊണ്ടാണ് സിനിമയുടെ ചിത്രീകരണം പൂർത്തിയാക്കിയത്.
