നടൻ മോഹൻലാലിന് എതിരെ നടൻ ശ്രീനിവാസൻ നടത്തുന്ന ആക്ഷേപങ്ങളിൽ പ്രതികരിച്ച് സംവി്ധായകൻ പ്രിയദർശൻ. ട്രേഡ് അനലിസ്റ്റ് ശ്രീധർ പിള്ളയ്ക്ക് നൽകിയ അഭിമുഖത്തിലാണ് പ്രിയദർശൻ ഇക്കാര്യത്തെക്കുറിച്ച് പ്രതികരിച്ചത്. സമീപകാലത്ത് ഒരു അഭിമുഖത്തിൽ മോഹൻലാലിന് എതിരെ ശ്രീനിവാസൻ ഉന്നയിച്ച പ്രസ്താവനകൾ ഏറെ മൂർച്ചയുളളതായിരുന്നു.
നടൻ പ്രേംനസീര്‍ ആദ്യമായി സംവിധാനം ചെയ്യാന്‍ ഉദ്ദേശിച്ച ചിത്രത്തില്‍ മോഹന്‍ലാലിനെ ആണ് നായകനായി ആലോചിച്ചിരുന്നതെന്നും എന്നാല്‍ ആ ചിത്രത്തിൽ അഭിനയിക്കാൻ മോഹൻലാലിന് താൽപര്യം ഇല്ലായിരുന്നെന്നും ആയിരുന്നു ശ്രീനിവാസന്റെ വെളിപ്പെടുത്തൽ. കഴിഞ്ഞയിടെ ഒരു വേദിയിൽ വെച്ച് മോഹൻലാൽ ചുംബിച്ചതിനെക്കുറിച്ച് ചോദിച്ചപ്പോൾ മോഹന്‍ലാല്‍ കംപ്ലീറ്റ് ആക്റ്റര്‍ ആണെന്ന് മനസിലായെന്ന് ആയിരുന്നു ശ്രീനിവാസന്റെ പ്രതികരണം.
ഈ വിഷയത്തിലാണ് പ്രിയദർശൻ ഇപ്പോൾ പ്രതികരിച്ചിരിക്കുന്നത്. രണ്ടു പേരും തന്റെ പ്രിയ സുഹൃത്തുക്കളാണെന്ന് പ്രിയദർശൻ പറഞ്ഞു. ‘എന്‍റെ പുതിയ ചിത്രം കൊറോണ പേപ്പേഴ്സില്‍ ഒരു സംഭാഷണമുണ്ട്. മറക്കുക എന്നത് മാനുഷികമാണ്, പൊറുക്കുക എന്നത് ദൈവികവും എന്ന്. മനുഷ്യര്‍ അത് ചെയ്യണമെന്നാണ് എന്‍റെ പക്ഷം. എന്താണ് ഇതിന് കാരണമെന്ന് എനിക്കറിയില്ല. അദ്ദേഹത്തിന്‍റെ അനാരോഗ്യം കാരണം എന്തെങ്കിലും പറഞ്ഞു പോകുന്നതായിരിക്കാം. എനിക്ക് അറിയില്ല. ഈ പ്രശ്നത്തിനു പിന്നിലുള്ള യഥാര്‍ഥ കാരണം അറിയാതെ ഞാന്‍ അതില്‍ ഒരു അഭിപ്രായം പറയുന്നത് ശരിയല്ല. സത്യന്‍ അന്തിക്കാടിനും ഇതിനെക്കുറിച്ച് ആശയക്കുഴപ്പമുണ്ട്. ഞങ്ങള്‍ ഇതേക്കുറിച്ച് സംസാരിച്ചിട്ടുണ്ട്. ഇതില്‍ മോഹന്‍ലാല്‍ ഒരിക്കലും പ്രതികരിച്ചിട്ടില്ല. അതാണ് ഇതിലെ നല്ല വശം. എന്താണ് പറയുക എന്നായിരിക്കും അദ്ദേഹം ചിന്തിച്ചിരിക്കുക. ശ്രീനിവാസന് അങ്ങനെ തോന്നിയിരിക്കാം. അതുകൊണ്ടാവാം പറഞ്ഞത് എന്നായിരിക്കും അദ്ദേഹം കരുതിയിട്ടുണ്ടാവുക. മോഹന്‍ലാലിന് ശ്രീനിവാസനെ അറിയാം”. പ്രിയദര്‍ശന്‍ പറഞ്ഞു.
