യുവതാരം ശ്രീനാഥ് ഭാസിക്ക് എതിരെ ഗുരുതര ആരോപണവുമായി പ്രൊഡക്ഷൻ കൺട്രോളറും നി‍ർമാതാവുമായ ബാദുഷ. ഖജുരാഹോ ഡ്രീംസ് എന്ന സിനിമയുടെ സമയത്ത് ശ്രീനാഥ് ഭാസിയുടെ ഭാഗത്തു നിന്ന് വളരെ മോശമായ അനുഭവമുണ്ടായെന്നാണ് ബാദുഷ വെളിപ്പെടുത്തിയത്. എയർപോർട്ടിൽ താൻ ചെക്ക് ഇൻ ചെയ്യിച്ച ഭാസി യാതൊരു കാരണവുമില്ലാതെ ഇറങ്ങി വരികയായിരുന്നുവെന്നാണ് ബാദുഷ ആരോപിക്കുന്നത്.
അതേസമയം, ഷെയിൻ നിഗവുമായി മൂന്ന് ചിത്രങ്ങൾ ചെയ്തിട്ടുണ്ടെങ്കിലും ഇത്തരത്തിൽ ഒരു മോശം അനുഭവം ഷെയിനിന്റെ ഭാഗത്തു നിന്ന് ഉണ്ടായിട്ടില്ലെന്ന് ബാദുഷ വ്യക്തമാക്കി. ഈ സംഭവവുമായി ബന്ധപ്പെട്ട് പരാതി നൽകണമെന്ന് നിർമാതാവിനോട് ആവശ്യപ്പെട്ടിരുന്നെന്നും എന്നാൽ സിനിമ നടക്കട്ടെ എന്ന് കരുതി പരാതി നൽകിയില്ലെന്നും ബാദുഷ പറഞ്ഞു.
ഇറങ്ങിപ്പോയ ശ്രീനാഥ് ഭാസിയെ കാര്യങ്ങൾ പറഞ്ഞ് മനസിലാക്കി ഫ്ലൈറ്റിൽ കയറ്റി വിടുകയായിരുന്നു. അപ്പോൾ താനും പ്രതികരിക്കാൻ പോയാൽ സിനിമ നിന്നു പോകുകയും നടന് വാശി കൂടുകയും ചെയ്തേനെ. ഗുഡ്‌ലൈൻ പ്രൊഡക്ഷൻസിന്റെ ബാനറിൽ എം കെ നാസർ നിർമിക്കുന്ന ചിത്രം നവാഗതനായ മനോജ് വാസുദേവ് ആണ് സംവിധാനം ചെയ്യുന്നത്. ശ്രീനാഥ് ഭാസിക്ക് ഒപ്പം അർജുൻ അശോകൻ, അതിഥി രവി, ധ്രുവൻ, ഷറഫുദ്ദീൻ എന്നിവരാണ് ചിത്രത്തിലെ മറ്റ് പ്രധാന അഭിനേതാക്കൾ.
