നിഷ്കളങ്കമായ ചിരിയുമായി ബിഗ് സ്ക്രീനിൽ തിളങ്ങിനിന്ന പ്രേക്ഷകരുടെ പ്രിയ മുത്തശ്ശി ഇനിയില്ല. നടി ആർ സുബ്ബലക്ഷ്മി അന്തരിച്ചു. 88 വയസ് ആയിരുന്നു. സംസ്കാരം ഇന്ന് നടക്കും. പരേതനായ കല്യാണരാമൻ ആണ് ഭർത്താവ്. നർത്തകിയും അഭിനേത്രിയുമായ താര കല്യാൺ, ഡോ ചിത്ര, കൃഷ്ണമൂർത്തി എന്നിവർ മക്കളാണ്.
2002ൽ നന്ദനം എന്ന ചിത്രത്തിലൂടെ ആയിരുന്നു അവർ അഭിനയരംഗത്തേക്ക് എത്തിയത്. തമിഴ്, ഹിന്ദി, തെലുങ്ക്, മലയാളം ഭാഷകളിലായി അഭിനയിച്ചു. ജവഹര്‍ ബാലഭവനില്‍ 27 വര്‍ഷം സംഗീതാധ്യാപികയായി ജോലി ചെയ്തിരുന്നു. വിരമിച്ചതിനു ശേഷമാണ് അഭിനയരംഗത്തേക്ക് എത്തിയത്. ഹോര്‍ലിക്‌സിന്റെ ഒരു പരസ്യചിത്രത്തിലൂടെയാണ് കാമറയുടെ മുന്നിലെത്തുന്നത്.
ദിലീപും നവ്യ നായരും പ്രധാന വേഷത്തിൽ എത്തിയ കല്യാണരാമൻ എന്ന സിനിമയിലെ പ്രകടനം അവരെ മലയാളികൾക്ക് പ്രിയങ്കരിയാക്കി. പാണ്ടിപ്പട, രാപ്പകൽ എന്നീ സിനിമയിലും ശ്രദ്ധേയ വേഷം ചെയ്തു.
