എന്നെ ബലമായി വിവസ്ത്രയാക്കുന്നത് കണ്ട് അവര്‍ സെക്‌സ് കോമഡി ചിത്രവുമായി സമീപിച്ചു; അതിശയം തോന്നുന്നു എന്ന് രാധിക ആപ്‌തെ

മാധ്യമപ്രവര്‍ത്തക ബര്‍ഖ ദത്ത് നടത്തിയ പ്രത്യേക പരിപാടിയായ വി ദ വിമണിലായിരുന്നു രാധികയുടെ തുറന്നുപറച്ചില്‍. കരിയറില്‍ ഒട്ടേറെ വ്യത്യസ്ത വേഷങ്ങളില്‍ അഭിനയിച്ചിട്ടുണ്ടെങ്കിലും ഒരു കാലത്ത് സെക്സ് കോമഡികള്‍ മാത്രം ചെയ്യാനേ നിര്‍മാതാക്കള്‍ തന്നെ സമീപിച്ചിട്ടുള്ളൂവെന്ന് പറയുകയാണ് ബോളിവുഡ് നടി രാധിക ആപ്‌തേ.

ശ്രീറാം രാഘവര്‍ സംവിധാനം ചെയ്ത ‘ബദ്‌ലാപൂര്‍’ എന്ന ചിത്രത്തിന് ശേഷമാണ് സംവിധായകര്‍ സെക്സ് കോമഡി പ്രോജക്ടുകളുമായി രാധികയെ സമീപിക്കാന്‍ തുടങ്ങിയത്. ചിത്രത്തില്‍ നായകന്‍ തന്നെ ബലമായി വസ്ത്രങ്ങള്‍ അഴിക്കാന്‍ ശ്രമിക്കുന്ന രംഗമുണ്ടായിരുന്നു. ഇതാണ് അതിന് കാരണമായതെന്നും രാധിക പറഞ്ഞു. എന്നാല്‍ ബലാത്സംഗം ചെയ്യാനും കൊല്ലാനും തുനിഞ്ഞയാള്‍ വസ്ത്രം ഊരിമാറ്റുന്നതുകണ്ട് സെക്‌സ് കോമഡി പ്രൊജക്ടുമായി തന്നെ സമീപിച്ചതില്‍ അതിശയമുണ്ടെന്നാണ് താരം പറയുന്നത്.

എനിക്കതിശയം തോന്നുന്നു. ഒരു ചിത്രത്തില്‍ എന്റെ കഥാപാത്രത്തെ മാനഭംഗപ്പെടുത്താനും കൊല്ലാനും ശ്രമിക്കുന്ന ഒരു മനുഷ്യന്‍ ഇരയുടെ വസ്ത്രം ബലംപ്രയോഗിച്ച്‌ അഴിച്ചെടുത്തതു കണ്ട് ആ കഥാപാത്രം ചെയ്ത സ്ത്രീയ്ക്ക് സെക്‌സ് കോമഡികളിലേക്ക് ക്ഷണം ലഭിക്കുക. ഒരു ഹ്രസ്വചിത്രത്തിലും വിവസ്ത്രയാകുന്ന രംഗമുണ്ട്. ഫിലിംമേക്കറുടെ കാഴ്ചപ്പാടിനോടോ, വ്യാഖ്യാനങ്ങളോടോ ഒരു തരത്തിലും യോജിക്കാന്‍ കഴിയാത്ത ഒരു ചിത്രം ഞാൻ ഒരിക്കലും ചെയ്യില്ല. സ്ത്രീകളോട് മോശമായി പെരുമാറുന്നവരോട് തിരിച്ചും അതേ നാണയത്തില്‍ പെരുമാറാന്‍ കഴിയണം. പുരുഷന്മാരെപ്പോലെ സ്ത്രീ പെരുമാറണം എന്നാണ് പലരും ആവശ്യപ്പെടുന്നത്. പക്ഷേ, സ്ത്രീകള്‍ ഒരിക്കലും പുരുഷനെപ്പോലെയാകാന്‍ ആഗ്രഹിക്കുന്നില്ല എന്നാണ് എന്റെ അഭിപ്രായം.

ഒരു സ്ത്രീ എന്ന നിലയില്‍ ഒരുപാട് ചിത്രങ്ങള്‍ എന്നെ അലോസരപ്പെടുത്തിയിട്ടുണ്ട്. സ്ത്രീകളെക്കുറിച്ചാണെന്ന് കേട്ടാല്‍ സമത്വത്തെക്കുറിച്ചാണ് സംസാരമെന്നൊക്കെയാണ് പലരുടെയും അഭിപ്രായം. ഒരുപാട് വേദികളില്‍ ഇതു സംബന്ധിച്ച്‌ എനിക്ക് ഭൂരിപക്ഷവുമായി അഭിപ്രായ വ്യത്യാസങ്ങളുണ്ടായിട്ടുണ്ട്. അത് തെറ്റോ, ശരിയോ, നല്ലതോ, ചീത്തയോ എന്നൊന്നും എനിക്കറിയില്ല.