രജനീകാന്തിനെ നായകനാക്കി നെല്‍സണ്‍ ദിലീപ് കുമാര്‍ സംവിധാനം ചെയ്യുന്ന ചിത്രമാണ് ജയിലര്‍. ചിത്രത്തില്‍ മോഹന്‍ലാലും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഇപ്പോഴിതാ ചിത്രത്തില്‍ രജനീകാന്തും മോഹന്‍ലാലും തമ്മില്‍ മാസ് ഫൈറ്റ് സീനുണ്ടെന്ന റിപ്പോര്‍ട്ടാണ് പുറത്തുവരുന്നത്.
സിനിമയിലെ ഹൈലൈറ്റാകും ഈ സംഘട്ടന രംഗമെന്നാണ് റിപ്പോര്‍ട്ട്. മോഹന്‍ലാല്‍, രജനീകാന്ത് ആരാധകരെ ആവേശത്തിലാഴ്ത്തുന്നതാകും ഈ സംഘട്ടനരംഗമെന്നാണ് സൂചന. കാമിയോ റോളിലായിരിക്കും മോഹന്‍ലാല്‍ ചിത്രത്തിലെത്തുകയെന്നാണ് വിവരം. മോഹന്‍ലാലും രജനീകാന്തും ഒന്നിക്കുന്ന ആദ്യചിത്രമാണിത്. കന്നഡ സൂപ്പര്‍ സ്റ്റാര്‍ ശിവരാജ് കുമാറും ചിത്രത്തില്‍ ഒരു പ്രധാന കഥാപാത്രമാകുന്നുണ്ട്.
മുത്തുവേല്‍ പാണ്ഡ്യന്‍ എന്ന ജയിലറുടെ വേഷത്തിലാണ് രജനീകാന്ത് ചിത്രത്തിലെത്തുന്നത്. ചിത്രത്തിന്റെ തിരക്കഥയൊരുക്കിയിരിക്കുന്നതും നെല്‍സനാണ്. തമന്നയാണ് ചിത്രത്തിലെ നായികാ കഥാപാത്രത്തെ അവതരിപ്പിക്കുന്നത്. അനിരുദ്ധിന്റേതാണ് സംഗീതം. ഈ വര്‍ഷം ഏപ്രില്‍ പതിനാലിന് ചിത്രം തീയറ്ററുകളില്‍ എത്തും.
