തമാശകളിലൂടെ മലയാളികളുടെ ഹൃദയത്തിൽ ഇടം കണ്ടെത്തിയ നടനാണ് രമേഷ് പിഷാരടി. മിമിക്രി ആർട്ടിസ്റ്റ് ആയും അവതാരകൻ ആയും നടനായും സംവിധായകൻ ആയും കഴിവ് തെളിയിച്ച് താരമാണ് രമേഷ് പിഷാരടി. രമേഷ് പിഷാരടി നായകനായി എത്തുന്ന പുതിയ ചിത്രമാണ് ‘നോ വേ ഔട്ട്’. ഏപ്രിൽ 22നാണ് ചിത്രം തിയറ്ററുകളിൽ റിലീസ് ചെയ്യുന്നത്. നിലവിൽ തിയറ്ററുകളിൽ കെ ജി എഫ് ചാപ്റ്റർ ടു ആണ് പ്രദർശിപ്പിച്ചു കൊണ്ടിരിക്കുന്നത്. ഇതിനിടയിലേക്കാണ് രമേഷ് പിഷാരടി നായകനായി എത്തുന്ന സർവൈവൽ ത്രില്ലർ ചിത്രമായ നോ വേ ഔട്ട് എത്തുന്നത്. ഇത് സംബന്ധിച്ച കമ്റ് ബോക്സിലെ രസകരമായ ഒരു ചർച്ചയാണ് ഇപ്പോൾ സോഷ്യൽ മീഡിയയിൽ ചർച്ചയായിരിക്കുന്നത്.
തന്റെ പുതിയ സിനിമയെക്കുറിച്ച് രമേഷ് പിഷാരടി പങ്കുവെച്ച പോസ്റ്റിന് താഴെയാണ് രസകരമായ ഈ ചർച്ച നടന്നത്. ‘കെ ജി എഫ് ടു തീമഴ സൃഷ്ടിക്കുമ്പോ ഇതുപോലെയുള്ള കൊച്ചു സിനിമകൾ തിയറ്ററിലൊക്കെ ഇറക്കുന്നത് റിസ്ക് അല്ലേ ചേട്ടായി’ എന്നാണ് ഒരു പ്രേക്ഷകൻ ചോദിച്ചത്. എന്നാൽ, റിസ്ക് റോക്കി ഭായിക്കാണോ എന്നായിരുന്നു പിഷാരടിയുടെ മറുപടി. ‘ആർക്ക്, റോക്കി ഭായിക്കോ’ – എന്ന രമേഷ് പിഷാരടിയുടെ സരസൻ മറുപടിക്ക് പിന്നെയും എത്തി മറുപടികൾ. ‘കഥ ഇനിയാണ് ആരംഭിക്കുന്നത്’ എന്ന് ഒരാൾ കുറിച്ചപ്പോൾ ‘ബി ജി എം ഇടൂ, ബി ജി എം ഇടൂ’ എന്ന് മറ്റൊരാളും കമന്റ് ചെയ്തിട്ടുണ്ട്.
നേരത്തെ ചിത്രത്തിന്റെ ട്രയിലറിന് വൻ വരവേൽപ്പ് ആയിരുന്നു ലഭിച്ചത്. രമേശ് പിഷാരടിയെ കേന്ദ്രകഥാപാത്രമാക്കി നവാഗതനായ നിതിന്‍ ദേവീദാസ് ആണ് നോ വേ ഔട്ട് ഒരുക്കുന്നത്. സർവൈവൽ ത്രില്ലർ ആയാണ് ചിത്രം ഒരുക്കിയിരിക്കുന്നത്. ട്രയിലറിൽ ഗംഭീരപ്രകടനമായിരുന്നു രമേഷ് പിഷാരടി കാഴ്ച വെച്ചത്. ഇതിനകം നിരവധി ഹാസ്യ കഥാപാത്രങ്ങളിലൂടെ പ്രേക്ഷകർക്ക് പ്രിയങ്കരനായി മാറിയ നടനാണ് രമേഷ് പിഷാരടി. അതുകൊണ്ടു തന്നെ ഒരു സീരിയസ് കഥാപാത്രമായി രമേഷ് പിഷാരടി എത്തുന്നു എന്നത് പ്രേക്ഷകർക്കും ഒരു പുതുമയാണ്. നിധിൻ ദേവീദാസ് തന്നെയാണ് ചിത്രത്തിന്റെ തിരക്കഥയും ഒരുക്കുന്നത്. ഏപ്രിൽ 22ന് ചിത്രം തിയറ്ററുകളിൽ റിലീസ് ചെയ്യും. ചിത്രത്തിൽ ബേസിൽ ജോസഫ്, രവീണ എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.
