ഗാനഗന്ധർവന് ശേഷമുള്ള രമേഷ് പിഷാരടിയുടെ ചിത്രത്തിൽ നായകൻ മമ്മൂട്ടി ?

വീണ്ടും സംവിധായകനാകാൻ രമേഷ് പിഷാരടി. പഞ്ചവർണതത്ത, ഗാനഗന്ധർവൻ എന്നീ ചിത്രങ്ങൾക്ക് ശേഷം മൂന്നാമത്തെ ചിത്രം സംവിധാനം ചെയ്യാൻ ഒരുങ്ങുകയാണ് രമേഷ് പിഷാരടി. മമ്മൂട്ടിയെ നായകനാക്കി സംവിധാനം ചെയ്ത ‘ഗാനഗന്ധർവൻ’ ആയിരുന്നു രമേഷ് പിഷാരടിയുടെ രണ്ടാമത്തെ ചിത്രം. ഇപ്പോൾ ഇതാ വീണ്ടും പുതിയ സിനിമ പ്രഖ്യാപിച്ചിരിക്കുകയാണ് പിഷാരടി. സോഷ്യൽ മീഡിയയിൽ പങ്കുവെച്ച കുറിപ്പിലാണ് പുതിയ ചിത്രത്തിന്റെ ജോലികൾ ആരംഭിച്ച കാര്യം രമേഷ് പിഷാരടി അറിയിച്ചിരിക്കുന്നത്.

‘ഇത് എനിക്ക് വളരെ സ്പെഷൽ ആയ ഒരു ഞായറാഴ്ച ആണ്. എന്റെ അടുത്ത സംവിധാന സംരംഭത്തിന്റെ എഴുത്തുജോലികൾ ആരംഭിച്ചു. മോഹൻലാൽ, ഈശോ എന്നീ സിനിമകളുടെ എഴുത്തുകാരനായ സുനീഷുമായി ചേർന്നാണ് എഴുത്തുജോലികൾ ആരംഭിച്ചിരിക്കുന്നത്. ആന്റോ ജോസഫ് ഫിലിം കമ്പനിയാണ് ചിത്രത്തിന്റെ നിർമാണം. ബാദുഷയാണ് പ്രൊഡക്ഷൻ ഡിസൈനർ’ – രമേഷ് പിഷാരടി സോഷ്യൽ മീഡിയയിൽ കുറിച്ചു.

പഞ്ചവർണ തത്തയ്ക്ക് ശേഷമുള്ള രമേഷ് പിഷാരടിയുടെ രണ്ടാമത്തെ ചിത്രമായ ‘ഗാനഗന്ധർവൻ’ൽ ഗാനമേള ഗായകൻ ആയ കലാദാസൻ ഉല്ലാസായി ആയിരുന്നു മമ്മൂട്ടി വേഷമിട്ടത്. പുതുമുഖം വന്ദിത ആയിരുന്നു ഈ ചിത്രത്തിൽ നായിക ആയിരുന്നത്. ഈ ചിത്രത്തിന്റെ കഥയും തിരക്കഥയും സംഭാഷണവും രമേശ് പിഷാരടിയും ഹരി പി നായരും ചേർന്ന് ഒരുക്കിയത്. നവാഗതനായ നിധിന്‍ ദേവീദാസ് സംവിധാനം ചെയ്യുന്ന ‘നോ വേ ഔട്ടാ’ണ് രമേശ് പഷാരടിയുടെ അണിയറയില്‍ ഒരുങ്ങുന്ന ഒരു ചിത്രം. സിബിഐ സീരിസിലെ അഞ്ചാമത്തെ ചിത്രത്തിൽ മമ്മൂട്ടിക്കൊപ്പം കേസന്വേഷണത്തിനിറങ്ങുന്ന ഉദ്യേ​ഗസ്ഥനായി പിഷാരടി അഭിനയിക്കുന്നുണ്ട്.