നിവിന്‍ പോളി, ആസിഫ് അലി എന്നിവരെ കേന്ദ്രകഥാപാത്രങ്ങളാക്കി എബ്രിഡ് ഷൈന്‍ സംവിധാനം ചെയ്ത മഹാവീര്യര്‍ പ്രേക്ഷകരിലേക്ക്. ചിത്രം ജൂലൈ 21ന് പ്രേക്ഷകരിലേക്ക് എത്തും. പ്രേക്ഷകര്‍ ഏറെ പ്രതീക്ഷയോടെ കാത്തിരിക്കുന്ന എബ്രിഡ് ഷൈന്‍ ചിത്രമാണ് മഹാവീര്യര്‍. ടൈം ട്രാവലറും ഫാന്റസിയും കോടതിയും നിയമവ്യവഹാരങ്ങളുമെല്ലാം പ്രമേയമാക്കുന്നതാണ് ചിത്രം.
എം. മുകുന്ദന്റെ കഥയുടെ ചലച്ചിത്ര ഭാഷ്യമാണ് മഹാവീര്യര്‍. ചിത്രത്തിന്റെ തിരക്കഥയൊരുക്കിയിരിക്കുന്നത് എബ്രിഡ് ഷൈന്‍ തന്നെയാണ്. പോളി ജൂനിയര്‍ പിക്ചര്‍സ്, ഇന്ത്യന്‍ മൂവി മേക്കര്‍സ് എന്നീ ബാനറുകളില്‍ നിവിന്‍ പോളി, പി. എസ് ഷംനാസ് എന്നിവര്‍ ചേര്‍ന്നാണ് ചിത്രം നിര്‍മിക്കുന്നത്. നിവിന്‍ പോളിക്കും ആസിഫ് അലിക്കും പുറമേ ,ലാല്‍, ലാലു അലക്‌സ്, സിദ്ദിഖ്, ഷാന്‍വി ശ്രീവാസ്തവ, വിജയ് മേനോന്‍, മേജര്‍ രവി, മല്ലിക സുകുമാരന്‍, സുധീര്‍ കരമന, കൃഷ്ണ പ്രസാദ്, പദ്മരാജന്‍ രതീഷ്, സുധീര്‍ പറവൂര്‍, കലാഭവന്‍ പ്രജോദ്, പ്രമോദ് വെളിയനാട്, ഷൈലജ പി അമ്പു തുടങ്ങിയവരും ചിത്രത്തില്‍ പ്രധാന വേഷങ്ങളെ അവതരിപ്പിക്കുന്നു.
സംസ്ഥാന അവാര്‍ഡ് ജേതാവായ ചന്ദ്രു സെല്‍വരാജാണ് ഛായാഗ്രഹണം നിര്‍വഹിച്ചിരിക്കുന്നത്. ഇഷാന്‍ ചാബ്ര സംഗീതവും പശ്ചാത്തല സംഗീതവും ഒരുക്കിയിരിക്കുന്നു. ചിത്രസംയോജനം മനോജും ശബ്ദമിശ്രണം വിഷ്ണു ഗോവിന്ദ്, ശ്രീശങ്കര്‍ എന്നിവര്‍ ചേര്‍ന്നും നിര്‍വഹിച്ചിരിക്കുന്നു. അനീസ് നാടോടിയാണ് കലാ സംവിധാനം. വസ്ത്രാലങ്കാരം ചന്ദ്രകാന്ത്, മെല്‍വി എന്നിവര്‍ ചേര്‍ന്നും ചമയം ലിബിന്‍ മോഹനനും മുഖ്യ സഹസംവിധാനം ബേബി പണിക്കരും നിര്‍വഹിച്ചിരിക്കുന്നു.
