ഇത്തവണത്തെ ബിഗ് ബോസ് മലയാളം സീസൺ നാലിൽ ഏറെ പ്രേക്ഷകപ്രീതി നേടിയ വ്യക്തി ആയിരുന്നു ബ്ലസ്‌ലി. ശക്തനായ മത്സരാർത്ഥി ആയിരുന്ന ബ്ലസ്‌ലി ഫസ്റ്റ് റണ്ണർ അപ്പ് ആയിരുന്നു. ഒരുപാട് ആരാധകരെ സ്വന്തമാക്കിയ ബ്ലസ്‌ലി സിനിമയിലേക്ക് എത്തുന്നു എന്നതാണ് ഏറ്റവും പുതിയ വാർത്തകൾ. വരാൻ പോകുന്ന ഒരു വലിയ സിനിന പ്രൊജക്ടിൽ ഒരു പ്രധാനപ്പെട്ട റോളിലേക്കാണ് തനിക്ക് ക്ഷണം ലഭിച്ചതെന്നാണ് ബ്ലസ്‌ലി അറിയിച്ചത്. ഒരു പൊതുപരിപാടിയിൽ ബ്ലസ്‌ലി തന്നെയാണ് ഇക്കാര്യം വെളിപ്പെടുത്തിയത്.
കഴിഞ്ഞദിവസം പത്തനാപുരത്ത് ഒരു ഉദ്ഘാടന ചടങ്ങിൽ പങ്കെടുക്കാൻ താരം എത്തിയിരുന്നു. ആ സമയത്ത് സദസിലുള്ളവരുമായി സംസാരിക്കവെയാണ് സിനിമ അഭിനയത്തെക്കുറിച്ച് ബ്ലസ്‌ലി മനസു തുറന്നത്. വരാൻ പോകുന്ന ഒരു വലിയ പ്രൊജക്ടിൽ തനിക്ക് ഒരു പ്രധാനപ്പെട്ട റോൾ ലഭിച്ചിട്ടുണ്ടെന്നാണ് ബ്ലസ്‌ലി അറിയിച്ചത്. ഇത് തന്നെ സംബന്ധിച്ച് ഒരു സ്വപ്നസാഫല്യമാണെന്നും എന്നാൽ കൂടുതൽ കാര്യങ്ങൾ വെളിപ്പെടുത്താൻ കഴിയില്ലെന്നും ബ്ലസ്‌ലി വ്യക്തമാക്കി.
ഈ പ്രൊജക്ടിലെ കഥാപാത്രത്തിനു വേണ്ടി താൻ താടിയും മുടിയും നീട്ടി വളർത്താൻ പോകുകയാണെന്നും ഒരു പുതിയ ലുക്കിൽ ആയിരിക്കും പ്രത്യക്ഷപ്പെടുകയെന്നും ബ്ലസ്‌ലി അറിയിച്ചു. താമസിയാതെ തന്നെ ഔദ്യോഗികമായി ചിത്രത്തിന്റെ വിശദാംശങ്ങൾ പുറത്തുവരുമെന്നും ബ്ലസ്‌ലി പറഞ്ഞു. സിനിമ ഓഫറുകൾ കൂടാതെ സ്റ്റേജ് ഷോകളിൽ പങ്കെടുക്കാനുള്ള അവസരങ്ങളും ഇപ്പോൾ ബ്ലസ്‌ലിയെ തേടിയെത്തുന്നുണ്ട്.
