തീയറ്ററുകളില്‍ വന്‍ ചലനം സൃഷ്ടിച്ചിരിക്കുകയാണ് കന്നഡ ചിത്രം കാന്താര. മലയാളം ഉള്‍പ്പെടെ മറ്റ് ഭാഷകളില്‍ എത്തിയ ചിത്രം മികച്ച പ്രതികരണം നേടി മുന്നേറുകയാണ്. ഇപ്പോഴിതാ മറ്റൊരു നേട്ടം കൂടി സ്വന്തമാക്കിയിരിക്കുകയാണ് ചിത്രം. കര്‍ണാടകയില്‍ ഏറ്റവും കൂടുതല്‍ ആളുകള്‍ കണ്ട ഹോംബാലെ പ്രൊഡക്ഷന്‍സിന്റെ ചിത്രം എന്ന ബഹുമതിയാണ് ചിത്രം നേടിയിരിക്കുന്നത്.
നേരത്തെ കെജിഎഫ് 2 ആയിരുന്നു ഹോംബാലെയുടെ ഏറ്റവും കൂടുതല്‍ പ്രേക്ഷകര്‍ കണ്ട ചിത്രം. കെജിഎഫിന് ലഭിച്ചതിനെക്കാള്‍ വലിയ സ്വീകാര്യതയാണ് ചിത്രത്തിന് ലഭിക്കുന്നതെന്നാണ് നിര്‍മാതാക്കള്‍ അറിയിച്ചിരിക്കുന്നത്. ഹോംബാലെ പ്രൊഡക്ഷന്‍ നിര്‍മിച്ച ഈ വര്‍ഷത്തെ രണ്ടാമത്തെ ഹിറ്റ് ചിത്രം കൂടിയാണ് കാന്താര. നിന്നിന്‍ഡേല്‍, മാസ്റ്റര്‍പീസ്, രാജകുമാര, കെജിഎഫ് 1, യുവരത്ന, കെജിഎഫ്: ചാപ്റ്റര്‍ 2 എന്നിവയുള്‍പ്പെടെ കന്നഡയിലെ മിക്ക ബോക്‌സോഫീസ് ഹിറ്റുകളുടെയും പിന്നില്‍ ഹോംബാലെയാണ്. രക്ഷിത് ഷെട്ടിയുടെ ‘റിച്ചാര്‍ഡ് ആന്റണിയാണ്’ കമ്പനിയുടെ അടുത്ത പ്രോജക്ട്. രാഘവേന്ദ്ര സ്റ്റോഴ്സിന്റെ ചിത്രീകരണവും പൂര്‍ത്തിയായിട്ടുണ്ട്.
ഋഷഭ് ഷെട്ടി സംവിധാനം ചെയ്ത് കേന്ദ്രകഥാപാത്രത്തെ അവതരിപ്പിക്കുന്ന ചിത്രം 19-ാം കാന്തപുരയില്‍ നടക്കുന്ന കഥയാണ് പറയുന്നത്. സപ്തമി ഗൗഡ, കിഷോര്‍, അച്യുത് കുമാര്‍, പ്രമോദ് ഷെട്ടി, ഷനില്‍ ഗുരു, പ്രകാശ് തുമിനാട്, മാനസി സുധീര്‍, നവീന്‍ ഡി പടീല്‍, സ്വരാജ് ഷെട്ടി, ദീപക് റായ് പനാജി, പ്രദീപ് ഷെട്ടി, രക്ഷിത് രാമചന്ദ്രന്‍ ഷെട്ടി, പുഷ്പരാജ് ബൊല്ലാറ തുടങ്ങിയവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്.
