ഏഷ്യാനെറ്റിൽ സംപ്രേക്ഷണം ചെയ്യുന്ന ബിഗ് ബോസ് സീസൺ 5 പരിപാടിയിൽ നിന്നും റോബിൻ രാധാകൃഷ്ണനെ പുറത്താക്കി. ഇത് രണ്ടാം തവണയാണ് ഒരേ പരിപാടിയിൽ നിന്ന് റോബിൻ രാധാകൃഷ്ണൻ പുറത്താകുന്നത്. ബിഗ് ബോസ് പരിപാടി നടത്താൻ കഴിയില്ലെന്ന് ഹൗസിനുള്ളിൽ വെല്ലുവിളിച്ച റോബിൻ ഹൗസിലെ സാധനങ്ങൾ നശിപ്പിക്കുമെന്നും പ്രഖ്യാപിച്ചു. ഇതോടെയാണ് കൺഫഷൻ റൂമിലേക്ക് റോബിനെ വിളിച്ചു വരുത്തിയ ബിഗ് ബോസ് ഇപ്പോൾ തന്നെ റോബിനെ ഷോയിൽ നിന്ന് പുറത്താക്കുകയാണെന്ന് പ്രഖ്യാപിച്ചത്.
കഴിഞ്ഞ ബിഗ് ബോസ് സീസണിലെ മത്സരാർത്ഥി ആയിരുന്ന റോബിൻ അതിഥിയായാണ് ഇത്തവണ എത്തിയത്. വീക്കിലി ടാസ്ക് ആയ ബിബി ഹോട്ടൽ ടാസ്കിലെ പോയിന്റുകൾ സംബന്ധിച്ച് അഖിൽ മാരാർക്കും ജുനൈസിനും ഇടയിൽ തർക്കം നടന്നിരുന്നു. അഖിൽ തോൾ ഉപയോഗിച്ച് ജുനൈസിനെ തള്ളി. ഇതിനിടെ ഹൗസിൽ നടന്നത് കായികമായ ആക്രമമാണെന്നും അതിനാൽ അഖിലിനെ പുറത്താക്കണമെന്നും റോബിൻ ആവശ്യപ്പെട്ടു. ഇക്കാര്യം ആവശ്യപ്പെട്ട് ബിഗ് ബോസിനോട് തട്ടിക്കയറിയ റോബിൻ തീരുമാനം ഉണ്ടായില്ലെങ്കിൽ ഹൗസിനുള്ളിലെ സാധനങ്ങൾ നശിപ്പിക്കുമെന്ന് വെല്ലുവിളിച്ചു.
ഇതിനിടയിൽ അഖിലിനെയും ജുനൈസിനെയും കൺഫഷൻ റൂമിലേക്ക് വിളിപ്പിച്ച ബിഗ് ബോസ് ഇരുവർക്കും താക്കീത് നൽകി ഹൗസിനുള്ളിലേകക് അയച്ചു. പ്രശ്നം പരിഹരിക്കപ്പെട്ടുവെന്ന് അറിഞ്ഞ റോബിൻ അഖിലിനെ പുറത്താക്കണമെന്ന് ആവശ്യപ്പെട്ടു. ”ഞാന്‍ ഈ ഷോ മുന്നോട്ട് നടത്തിക്കില്ല. ഈ ഷോ ഒരു തരത്തിലും മുന്നോട്ടുപോവൂല. ഞാനിവിടുന്നു ഇറങ്ങുകയുമില്ല. ഇവിടെ നിന്നും പോകുകയാണെങ്കില്‍ മാരാരെയും കൊണ്ടേ പോകൂ.” എന്നൊക്കെ റോബിന്‍ വെല്ലുവിളിച്ചു. ഹൗസിനുള്ളിലെ ക്യാമറ നശിപ്പിക്കുമെന്നും പ്രഖ്യാപിച്ചു. ഇതോടെ റോബിനെ കൺഫെഷൻ റൂമിലേക്ക് വിളിപ്പിച്ച ബിഗ് ബോസ് ഷോയ്ക്ക് തടസമുണ്ടാക്കിയെന്ന് ചൂണ്ടിക്കാണിച്ച് ഷോയിൽ നിന്ന് പുറത്താക്കുകയായിരുന്നു,
