ആരാധകർ ആവേശത്തോടെ കാത്തിരിക്കുന്ന രാജമൗലി ചിത്രം എത്താൻ ഇനി ദിവസങ്ങൾ മാത്രം. മാർച്ച് 25ന് ചിത്രം തിയറ്ററുകളിലേക്ക് എത്തും. ഏതായാലും റിലീസിന് മുമ്പായി ചിത്രത്തിന്റെ ആദ്യ റിവ്യൂ എത്തിയിരിക്കുകയാണ്. ചിത്രത്തിന്റെ കളറിസ്റ്റ് കൂടിയായ ശിവകുമാർ ആണ് ആർ ആർ ആർ സിനിമ കണ്ട് റിവ്യൂ നൽകിയിരിക്കുന്നത്. വളരെ ചുരുങ്ങിയ വാചകങ്ങളിൽ ട്വീറ്റ് ചെയ്ത റിവ്യൂ ആരാധകർ ഏറ്റെടുത്തിരിക്കുകയാണ്.
ചിത്രത്തിന്റെ കളറിസ്റ്റ് ആയ ശിവകുമാർ ഫൈനൽ കോപ്പി കണ്ടതിനു ശേഷമാണ് തന്റെ നിരൂപണം സോഷ്യൽ മീഡിയയിൽ പങ്കുവെച്ചത്. ‘ഇപ്പോൾ ആർ ആർ ആർ കണ്ടു. കളറിസ്റ്റ് എന്ന നിലയിൽ ഓരോ ഫ്രെയിമും ആയിരം തവണ കണ്ടെങ്കിലും ഒരു പ്രേക്ഷകനെന്ന നിലയിൽ അവസാന കോപ്പി കണ്ടപ്പോൾ ഞാൻ കൂടുതൽ വികാരഭരിതനായി. ഞാൻ ഉറപ്പിച്ച് പറയുന്നു ഇത് എല്ലാ റെക്കോർഡുകളും ബ്രേക്ക് ചെയ്യും. പുതിയ റെക്കോഡുകൾ സൃഷ്ടിക്കും. ഇത് 3,000 കോടിയിൽ കൂടുതൽ ബോക്സ്ഓഫീസിൽ നേടുകയും ഇന്ത്യയിലെ തന്നെ വൻ വിജയമായി മാറുകയും ചെയ്യും.’ – ശിവകുമാർ കുറിച്ചു.
ലോകമെമ്പാടുമുള്ള 6000 സ്ക്രീനുകളിലാണ് ആർ ആർ ആർ റിലീസിന് എത്തുന്നത്. കീരവാണിയാണ് ആർ ആർ ആർ ചിത്രത്തിനായി ഈണങ്ങൾ ഒരുക്കിയത്. ചിത്രത്തിന്റെ ട്രയിലറും ഗാനങ്ങളും വലിയ സെൻസേഷനായി മാറിയിരുന്നു. കോമരം ഭീം ആയി ജൂനിയർ എൻ ടി ആറും അല്ലൂരി സീതാരാമരാജുവായി രാം ചരണും നടത്തുന്ന പ്രകടനങ്ങൾ കാണാൻ വേണ്ടി ആരാധകർ കാത്തിരിക്കുകയാണ്.
Just seen @RRRMovie. Although I saw each frame 1000s of times as a colorist, I was more emotional when I saw the last copy as a regular audience.
I say strongly, it breaks all records and creates new records that no one can break & it charges over 3k crores.
Write it down…. pic.twitter.com/z5LSrg1yRN
— Shiva Kumar BVR (@shivabvr) March 15, 2022
