സോഷ്യൽ മീഡിയ പ്ലാറ്റ് ഫോം ആയ ഇൻസ്റ്റഗ്രാമിൽ പരസ്പരം അൺഫോളോ ചെയ്ത് സംഗീതസംവിധായകൻ ഗോപി സുന്ദറും ഗായിക അമൃത സുരേഷും. ഇരുവരും പ്രണയം പ്രഖ്യാപിച്ച പോസ്റ്റും അപ്രത്യക്ഷമായി. ഇരുവരും ഒരുമിച്ചുള്ള ചിത്രങ്ങളും സോഷ്യൽമീഡിയയിൽ നിന്ന് നീക്കം ചെയ്തതോടെ ആരാധകർ ആശയക്കുഴപ്പത്തിൽ ആയിരിക്കുകയാണ്. ഗോപി സുന്ദറും അമൃത സുരേഷും തമ്മിലുള്ള പ്രണയജീവിതം ഇതോടെ അവസാനിച്ചു എന്ന തരത്തിലുള്ള ചർച്ചകൾ സോഷ്യൽമീഡിയയിൽ സജീവമാണ്.
ജീവിത്തതിലെ വിഷമഘട്ടങ്ങൾ പിന്നിട്ട് ഒരുമിച്ച് മനോഹരയാത്ര ആരംഭിക്കുകയാണെന്നും ആരാധകരുടെ സ്നേഹവും പ്രാർത്ഥനയും എന്നും തങ്ങൾക്കൊപ്പം ഉണ്ടാകുമെന്ന് പ്രതീക്ഷിക്കുന്നതായും കുറിച്ച് കൊണ്ടാണ് ഇരുവരും പ്രണയം പ്രഖ്യാപിച്ചത്. തങ്ങളുടെ പ്രണയപ്രഖ്യാപനത്തിന്റെ ഒന്നാം വാർഷികം രണ്ടുമാസം മുമ്പ് ഇരുവരും ആഘോഷമാക്കുകയും ചെയ്തിരുന്നു.
സാമൂഹ്യമാധ്യമങ്ങളിൽ സജീവമാണ് അമൃതയും ഗോപി സുന്ദറും. തങ്ങളുടെ ജീവിതത്തിലെ എല്ലാ വിശേഷങ്ങളും അവർ ആരാധകരെ അറിയിക്കാറുണ്ട്. വേർപിരിഞ്ഞുവെന്ന പ്രചാരണം ശക്തമാണെങ്കിലും ഇതുവരെയും ഇരുവരും ഔദ്യോഗിക പ്രതികരണങ്ങളൊന്നും നടത്തിയിട്ടില്ല.
