യുവനടനായ വിഷ്ണു ഉണ്ണിക്കൃഷ്ണൻ, ജോണി ആന്റണി എന്നിവർ പ്രധാനവേഷങ്ങളിൽ എത്തുന്ന ചിത്രമാണ് ‘സബാഷ് ചന്ദ്രബോസ്’. ഓഗസ്റ്റ് അഞ്ചിന് തിയറ്ററുകളിൽ എത്തിയ ചിത്രത്തിന് വളരെ മികച്ച പ്രതികരണമാണ് ലഭിച്ചു കൊണ്ടിരിക്കുന്നത്. ചിത്രം മികച്ചതാണെന്ന് നിരവധി പേരാണ് അഭിപ്രായപ്പെട്ടിരിക്കുന്നത്. കേരളത്തിൽ മികച്ച അഭിപ്രായം സ്വന്തമാക്കിയ ചിത്രം ജിസിസി റിലീസിന് തയ്യാറെടുക്കുകയാണ്. ഓഗസ്റ്റ് 11 മുതൽ ചിത്രം ഗൾഫ് രാജ്യങ്ങളിൽ പ്രദർശിപ്പിച്ച് തുടങ്ങും. യു എ ഇ, ഒമാൻ, ബഹ്റിൻ, ഖത്തർ എന്നിവിടങ്ങളിലെ തിയറ്റർ ലിസ്റ്റ് തയ്യാറായി. ചിത്രത്തിന്റെ സംവിധായകൻ വി സി അഭിലാഷ് തന്നെയാണ് തിയറ്റർ ലിസ്റ്റ് പുറത്തുവിട്ടത്.
വി സി അഭിലാഷ് ആണ് ചിത്രം സംവിധാനം ചെയ്യുന്നത്. ചിത്രത്തിന്റെ പോസ്റ്ററുകളും ടീസറുകളുമൊക്കെ ശ്രദ്ധിക്കപ്പെട്ടിരുന്നു. ആളൊരുക്കം എന്ന ചിത്രത്തിന് ശേഷം വി സി അഭിലാഷ് സംവിധാനം ചെയ്യുന്ന രണ്ടാമത്തെ ചിത്രമാണ് സബാഷ് ചന്ദ്രബോസ്. ജോളിവുഡ് മൂവീസിന്റെ ബാനറിൽ ജോളി ലോനപ്പൻ ആണ് ചിത്രം നിർമിക്കുന്നത്.
ജുറാസിക് പാർക്ക് അടക്കമുള്ള വിദേശ സിനിമകൾ കേരളത്തിലെത്തിച്ച ക്യാപ്പിറ്റൽ സ്റ്റുഡിയോസ് ആണ് സബാഷ് ചന്ദ്രബോസ് തിയറ്ററുകളിൽ എത്തിക്കുന്നത്. ചിത്രത്തിലെ നായികയായി എത്തുന്നത് സ്നേഹ പാലിയേരി ആണ്. ധര്‍മ്മജന്‍ ബോള്‍ഗാട്ടി, ജാഫര്‍ ഇടുക്കി, ഇര്‍ഷാദ്, സുധി കോപ്പ, കോട്ടയം രമേശ്, രമ്യ സുരേഷ്, ശ്രീജ ദാസ്, അദിതി മോഹൻ, ഭാനുമതി പയ്യന്നൂർ, മുഹമ്മദ് എരവട്ടൂർ, ബാലു തുടങ്ങിയവരാണ് മറ്റു പ്രമുഖ താരങ്ങൾ. ‘ഉണ്ട’, ‘സൂപ്പർ ശരണ്യ’ എന്നീ ചിത്രങ്ങൾക്ക് ശേഷം സജിത്ത് പുരുഷൻ ക്യാമറ ചലിപ്പിക്കുന്ന ചിത്രം കൂടിയാണിത്.
