“ലൂസിഫറിലേക്ക് വിളിച്ചപ്പോൾ ബുദ്ധിമുട്ടാണെന്ന് പറഞ്ഞു; അങ്ങനെ ഒരു ബുദ്ധിമുട്ടുള്ള ആളായിരിക്കും ക്യാരക്ടറെന്ന് പൃഥ്വിയും പറഞ്ഞു” സായി കുമാർ

നായകനായി വന്ന് പിന്നീട് വില്ലൻ വേഷങ്ങളിലേക്ക് ചുവട് മാറ്റിയ സായി കുമാർ മലയാളികൾക്ക് ഓർത്തിരിക്കുവാനുള്ള നിരവധി വില്ലൻ വേഷങ്ങൾ സമ്മാനിച്ചിട്ടുണ്ട്. അവയിൽ ഉയർന്ന തട്ടിൽ തന്നെ നിൽക്കുന്ന ഒന്നാണ് ലൂസിഫറിലെ മഹേഷ് വർമ്മ. ലൂസിഫറിലെ ‘തന്റെ തന്തയല്ല എന്റെ തന്ത’ എന്ന മാസ്സ് ഡയലോഗ് ഓർക്കുമ്പോഴും മഹേഷ് വർമയെ കൂടി ഓർക്കാതിരിക്കാൻ പറ്റില്ല. എന്നാൽ ലൂസിഫറിലേക്ക് ക്ഷണിച്ചപ്പോൾ ആദ്യം ബുദ്ധിമുട്ടാണെന്നാണ് പറഞ്ഞതെന്ന് വെളിപ്പെടുത്തിയിരിക്കുകയാണ് സായി കുമാർ.

ലൂസിഫര്‍ സിനിമയിലേയ്ക്ക് വിളിക്കുമ്പോള്‍ എന്റെ കാലിന് കുറച്ച് പ്രശ്‌നമുണ്ടായിരുന്നു. പ്രൊഡക്ഷന്‍ കണ്‍ട്രോളര്‍ സിദ്ദു പനക്കനിലെ വിളിച്ച് ഇക്കാര്യം പറഞ്ഞു. ഈ കാല് വച്ച് അഭിനയിക്കാന്‍ ബുദ്ധിമുട്ടാകുമെന്ന് ഞാന്‍ പറഞ്ഞു. അപ്പോള്‍ തന്നെ പൃഥ്വി എന്നെ വിളിച്ചു. എന്താ ചേട്ടാ പ്രശ്‌നം എന്നു ചോദിച്ചു. കാലിന് ഇങ്ങനെയൊരു വേദനയുണ്ട് മോനേ, നടക്കാന്‍ ബുദ്ധിമുട്ടാണെന്ന് പറഞ്ഞു. ‘അതാണ് എന്റെ സിനിമയിലെ കാരക്ടര്‍ എന്ന് പൃഥ്വി മറുപടിയായി പറഞ്ഞു. ഇനി ചേട്ടന് നടക്കാന്‍ തീരെ ബുദ്ധിമുട്ട് ആണെങ്കില്‍ എന്റെ കാരക്ടറും അങ്ങനെയുള്ള ഒരാളായിരിക്കുമെന്ന് പൃഥ്വി എന്നോട് പറഞ്ഞു. അങ്ങനെയാണ് ലൂസിഫര്‍ ചെയ്തത്.’

‘സുകുവേട്ടനും ഞാനും അടുത്തബന്ധമുള്ള ആളുകളാണ്. അത് സിനിമയിലെ ബന്ധമല്ല. ജീവിതത്തിലെ രണ്ട് ജ്യേഷ്ഠന്മാരാണ് സുകുവേട്ടനും സോമേട്ടനും. സോമേട്ടന്റെ അടുത്ത് മൂത്ത ചേട്ടന്റെ ബന്ധം. എന്നാല്‍ സുകുവേട്ടനും ഞാനും ഒരു വയസ്സിനു വ്യത്യാസമുള്ള സഹോദരങ്ങളെപ്പോലെയായിരുന്നു. അദ്ദേഹത്തിന്റെ മകന്‍ നടനാകുക. വലിയ സംവിധായകനാകുക. അവനൊപ്പം സിനിമയില്‍ പ്രവര്‍ത്തിക്കാനാകുന്നത് തന്നെ വലിയ കാര്യം.’