ചുംബനരംഗങ്ങളിലോ കിടപ്പറ രംഗങ്ങളിലോ ഒരിക്കലും അഭിനയിക്കില്ലെന്ന് ഉറപ്പ് പറഞ്ഞിട്ടുള്ള നടിയാണ് സായി പല്ലവി. പ്രേമം എന്ന ഒറ്റ ചിത്രം കൊണ്ട് ദക്ഷിണേന്ത്യ മുഴുവൻ ആരാധകരെ നേടിയെടുത്ത സായി പല്ലവി അഭിനയിച്ച ലൗ സ്റ്റോറി എന്ന ചിത്രം മികച്ച കളക്ഷൻ നേടി മുന്നേറുകയാണ്. നാഗചൈതന്യ നായകനായ ചിത്രത്തിലെ ഒരു ചുംബനരംഗം അതിനിടയിൽ വൈറലായിരിക്കുകയാണ്.
ചിത്രത്തിന്റെ പ്രചരണാർത്ഥം നൽകിയ ഒരു അഭിമുഖത്തിൽ ആ ചുംബനരംഗത്തെ കുറിച്ച് വെളിപ്പെടുത്തിയിരിക്കുകയാണ് താരമിപ്പോൾ. “ഞാൻ ഒരിക്കലും ചുംബനരംഗങ്ങളിൽ അഭിനയിക്കില്ല. ഞാൻ അതിന് എതിരാണ്. സംവിധായകൻ ശേഖർ കമ്മുലയോട് ഞാൻ ഈ കാര്യം ഉറപ്പിച്ച് പറഞ്ഞിരുന്നു. അതുകൊണ്ട് തന്നെ അദ്ദേഹം എന്നെ നിർബന്ധിച്ചതുമില്ല. ആ രംഗം ശരിക്കും ക്യാമറാമാന്റെ മാന്ത്രികത തന്നെയാണ്. അങ്ങനെ ഒരു ആങ്കിൾ ഒരുക്കി യാഥാർത്ഥമെന്ന നിലയിലാണ് ആ രംഗം പകർത്തിയത്.
അതേസമയം ചിത്രത്തിലെ പ്രധാന രംഗമായ തീവണ്ടിക്കകത്തെ ആ ഒരു ചുംബനരംഗത്തിന് വേണ്ടി നാഗചൈതന്യ ആറ് മണിക്കൂറോളം എടുത്തുവെന്നാണ് റിപ്പോർട്ട്. സന്തോഷവും അത്ഭുതവും ചെറിയൊരു വേദനയും നാഗചൈതന്യക്ക് ആ രംഗത്ത് മുഖത്ത് പ്രതിഫലിപ്പിക്കുക വേണമായിരുന്നു. ആ ഒരു വികാരം മുഖത്ത് വരുവാൻ ആറ് മണിക്കൂറാണ് താരം എടുത്തത്.
