സമൂഹ മാധ്യമങ്ങളിൽ ബോളിവുഡ് താരങ്ങൾ എല്ലാം പങ്കുവെക്കുന്ന ചിത്രങ്ങൾ അവരുടെ യഥാർത്ഥ ചിത്രങ്ങൾ അല്ല, അത് ഫോട്ടോഷോപ്പ് ചെയ്ത ചിത്രങ്ങൾ ആണെന്ന് സമീറ റെഡ്‌ഡി. ഈ ഒതുങ്ങിയ അരക്കെട്ടും ആലില വയറും സോഫ്റ്റ് വെയറിന്റെ സഹായത്തോടെ ചെയ്യുന്നതാണെന്ന് താരം. 2010 ൽ താരം തിളങ്ങി നിൽക്കുന്ന സമയത്തെ തന്റെ ചിത്രം പങ്കുവെച്ചാണ് സമീറ ഈ കാര്യം വെളിപ്പെടുത്തിയത്, താനടക്കമുള്ള താരങ്ങൾ പങ്കുവെക്കുന്ന ചിത്രങ്ങൾ എല്ലാം തന്നെ ഫോട്ടോഷോപ്പ് ചെയ്‍തതാണ് എന്നാണ് സമീറ വ്യക്തമാക്കുന്നത്.
‘നിങ്ങള്‍ക്ക് എന്റെ മുഖത്തെ കുരുക്കളോ പാടുകളോ കാണാനാകുുന്നുണ്ടോ? വയറില്‍ തൂങ്ങി കിടക്കുന്ന ചര്‍മം കാണുന്നുണ്ടോ? യഥാര്‍ത്ഥ താടിയെല്ലും അരക്കെട്ടുമോ? എന്റെ ശരീരത്തിലെ ഏത് ഭാഗമാണ് ടച്ച് അപ്പ് ചെയ്യാത്തത്? ഉത്തരം എല്ലാ ഭാഗവും ക്ലീന്‍ ആക്കിയതാണെന്നാണ്. വലിക്കുകയും മെലിയിക്കുകയും ചെയ്തിട്ടുണ്ട്. 2010ലെ ചിത്രമാണിത്. താരതമ്യം കാണിക്കാന്‍ ടച്ച് അപ്പ് ചെയ്യാത്ത ഒറിജിനല്‍ ചിത്രം ഇപ്പോഴുണ്ടായിരുന്നുവെങ്കിലെന്ന് ആഗ്രഹിച്ചു പോകുന്നു. എന്റെ ശരീരം എങ്ങനെയാണോ അതുപോലെ തന്നെ സ്നേഹിക്കണമെന്ന് തിരിച്ചറിയാന്‍ കുറച്ച് വെെകി. ആ സുഖം നിങ്ങളൊഴികെ മറ്റാര്‍ക്കും നല്‍കാനാകില്ല” സമീറ പറയുന്നു.
നേരത്തെ പ്രസവ ശേഷം തനിക്ക് നേരിടേണ്ടി വന്ന ബോഡി ഷെയ്മിങ്ങിനെതിരെ സമീറ രംഗത്ത് എത്തിയിരുന്നു. അടുത്ത കാലത്തായി മേക്കപ്പിടാതെ ലൈവിൽ താരം എത്തിയത് വലിയ വാർത്ത ആയിരുന്നു, താരത്തിന്റെ ഈ തുറന്നു പറച്ചിലുകള്‍ക്ക് സോഷ്യല്‍ മീഡിയയും ആരാധകരും കെെയ്യടിക്കുകയാണ്.
