അമുദന്‍ എന്ന കഥാപാത്രത്തിലേക്ക് മമ്മൂട്ടി എന്ന മെഗാസ്റ്റാര്‍ പരകായ പ്രവേശനം ചെയ്ത ചിത്രമാണ് പേരന്‍പ് എന്ന് പറയാം. കഴിഞ്ഞ കുറച്ച്‌ വര്‍ഷങ്ങളായി മമ്മൂട്ടിയെന്ന മെഗാസ്റ്റാറിനെ കോട്ടും ഇടീച്ച്‌ കൂളിംഗ് ഗ്ലാസും വെച്ച്‌ സ്ലോ മോഷനില്‍ നടത്തിക്കാനാണ് മലയാളത്തിലെ സംവിധായകര്‍ ശ്രമിക്കുന്നത്. എന്നാല്‍, മമ്മൂട്ടി എന്ന മഹാനടനെ ശരിക്കും ഉപയോഗിക്കുന്നത് അന്യഭാഷാ സംവിധായകര്‍ ആണ്.
റാം സംവിധാനം ചെയ്യുന്ന തമിഴ് ചിത്രം പേരന്‍പ്, മഹി വി രാഘവ് സംവിധാനം ചെയ്യുന്ന തെലുങ്ക് ചിത്രം യാത്ര എല്ലാം ഇതിനുദാഹരണം. റാമിന്റെ പേരന്‍പിന്റെ ടീസര്‍ ഇന്നലെയാണ് പുറത്തിറങ്ങിയത്. മമ്മൂട്ടിയെന്ന അതുല്യ നടനെയാണ് ടീസറില്‍ കാണുന്നത്.
ചിത്രത്തിന്റെ ഓഡിയോ ലോഞ്ചില്‍ വന്‍താരനിരയാണ് അണിനിരന്നത്.
ചിത്രത്തിലെ പ്രധാന കഥാപാത്രം അവതരിപ്പിക്കുന്ന മെഗാസ്റ്റാര്‍ മമ്മൂട്ടിയെക്കുറിച്ച്‌ നടന്‍ സത്യരാജ് പറഞ്ഞ കാര്യങ്ങളാണ് സമൂഹമാധ്യമത്തില്‍ വൈറലാകുന്നത്. വില്ലനായി അഭിനയിച്ചിരുന്ന തന്നെ ഒരു ഹീറോയാക്കി മാറ്റാന്‍ സഹായിച്ചത് മമ്മൂട്ടി ആണെന്ന് സത്യരാജ് പറയുന്നു.
എഴുപതിലധികം സിനിമകളില്‍ വില്ലനായി അഭിനയിച്ച ശേഷമാണ് ഒരു ചിത്രത്തില്‍ ഞാന്‍ നായകനാകുന്നത്. അതിനു കാരണമായത് മമ്മൂട്ടി ആണ്. അദ്ദേഹം അഭിനയിച്ച മലയാള ചിത്രങ്ങളുടെ റീമേക്കുകളിലാണ് ഞാന്‍ ഹീറൊയാകുന്നത്. അങ്ങനെയാണ് ഞാന്‍ ഹീറോയാകുന്നത്. അതിനാല്‍ ഈ അവസരത്തില്‍ മമ്മൂട്ടിയോട് തന്റെ നന്ദി അറിയിക്കുന്നുവെന്നും സത്യരാജ് പറഞ്ഞു.
