‘അങ്ങനെ ഒരാൾ മാത്രം നന്നാകരുതല്ലോ’; സൈജു കുറുപ്പിനെ വഷളാക്കിയെടുക്കാൻ സാറ്റർഡേ നൈറ്റ് സെറ്റിൽ നിവിൻ പോളിയും സംഘവും നടത്തിയത് വലിയ പോരാട്ടം

യുവതാരങ്ങളായ നിവിൻ പോളി, സിജു വിൽസൺ, അജു വർഗീസ്, സൈജു കുറുപ്പ് എന്നിവർ നായകരായി എത്തുന്ന ചിത്രം ‘സാറ്റർഡേ നൈറ്റ്’ റിലീസ് ആയിരിക്കുകയാണ്. ചിത്രത്തിന്റെ പോസ്റ്ററുകളും ട്രയിലറും ടീസറുമെല്ലാം വളരെ ശ്രദ്ധിക്കപ്പെട്ടിരുന്നു. ചിത്രം റിലീസ് ആകുന്നതിന് മുന്നോടിയായി പ്രമോഷന്റെ ഭാഗമായി താരങ്ങൾ നൽകിയ ഒരു അഭിമുഖമാണ് ഇപ്പോൾ വൈറലായിരിക്കുന്നത്. മാതൃഭൂമി ഡോട്ട് കോമിന് നൽകിയ അഭിമുഖത്തിൽ നിവിൻ, സിജു, അജു എന്നിവർക്ക് ഒപ്പം ചേർന്നപ്പോൾ തനിക്ക് സംഭവിച്ച മാറ്റങ്ങളെക്കുറിച്ച് വാചാലനാകുകയാണ് സൈജു കുറുപ്പ്.

വ്യക്തികൾ യഥത്ഥത്തിൽ ആരാണ്, എങ്ങനെയാണ് എന്നെല്ലാം തിരിച്ചറിയാൻ കഴിയുക അവർ ചില ഗ്യാങ്ങിനൊപ്പം ചേരുമ്പോഴാണെന്ന് വ്യക്തമാക്കുകയാണ് സൈജു കുറുപ്പ്. സിജുവുമായി അഞ്ച് സിനിമകൾ ചെയ്തിട്ടുണ്ട്. സിനിമകളെപ്പറ്റി സംസാരിച്ച് നടന്നിട്ടുണ്ട്. ഒരുമിച്ച് സംസാരിക്കുകയും ഭക്ഷണം കഴിക്കുകയും ചെയ്തിട്ടുണ്ട്. എന്നാൽ, സിജു ആളുകളെ ഇത്ര നന്നായി ട്രോളുമെന്നും കളിയാക്കി തേച്ചൊട്ടിക്കുമെന്നും മനസിലായത് നിവിന് ഒപ്പം സെറ്റിൽ എത്തിയപ്പോഴാണ്. നിക്കറിട്ട കാലം മുതലേയുള്ള സുഹൃത്തുക്കളാണ് നിവിനും സിജുവുമെന്നും നിവിനൊപ്പം ചേർന്നതോടെ സിജു വേറൊരാളായി മാറിയെന്നും പറയുകയാണ് സൈജു കുറുപ്പ്.

ബംഗളൂരും മൈസൂരും നിവിനും സിജുവിനും സ്വന്തം വീടു പോലെയാണ്. അവർ ഇറങ്ങിക്കളിച്ച സ്ഥലമാണ്. പുതിയ സിനിമയുടെ ഷൂട്ടിങ്ങ് പഴയ തട്ടകത്തിലായപ്പോൾ ഇരുവരും കൂടുതൽ ഉഷാറായെന്നും നഗരത്തിലെ ചെറിയ ഊടുവഴികൾ പോലും ഇവർക്ക് കാണാപ്പാഠമാണെന്നും സൈജു കുറുപ്പ് പറഞ്ഞു. മൈലാരി ദോശ, ഹനുമന്തു ബിരിയാണി, പെലിക്കനിലെ പോർക്ക് അങ്ങനെ മൈസൂരിലെ ലോക്കൽ ഫുഡ‍ുകൾ ഒരുപാട് പരിചയപ്പെടാൻ കഴിഞ്ഞെന്നും സൈജു കുറുപ്പ് പറഞ്ഞു. എന്നാൽ ഫുഡ് എത്ര നന്നായിട്ടും കാര്യമില്ലെന്നും ഏഴു മണിക്ക് ശേഷം ഒന്നും കഴിക്കില്ലെന്ന ഒരു വിചിത്രമായ ആചാരം പുള്ളിക്ക് ഉണ്ടെന്നും അജു പറഞ്ഞു. എന്നാൽ, വർഷങ്ങളായുള്ള തന്റെ ചിട്ടകൾ ഇവന്മാരെല്ലാവരും കൂടി തെറ്റിച്ചെന്ന് സൈജു പറഞ്ഞു. അങ്ങനെ ഒരാൾ മാത്രം നന്നാകരുതല്ലോ എന്നായിരുന്നു നിവിന്റെ പ്രതികരണം. ഷൂട്ടിങ്ങ് തിരക്കിനിടയിലും തങ്ങളെക്കൊണ്ട് പറ്റുന്ന പോലെ പുള്ളിയെ മാറ്റിയെടുത്തെന്നും നിവിൻ പറഞ്ഞു.