ദുൽഖർ സൽമാൻ, കീർത്തി സുരേഷ് എന്നിവരെ നായകരാക്കി നാഗ് അശ്വിൻ സംവിധാനം നിർവഹിച്ച മഹാനടിക്ക് ഗംഭീര റിപ്പോർട്ടുകളാണ് ലഭിച്ചു കൊണ്ടിരിക്കുന്നത്. ഇതിഹാസനായിക സാവിത്രിയുടെ യഥാർത്ഥ ജീവിതത്തെ തുറന്നു കാണിക്കുന്ന ചിത്രം ബോക്സ് ഓഫീസിൽ ബാഹുബലിക്ക് ശേഷം ഏറ്റവും മികച്ച പ്രകടനം പുറത്തെടുക്കുന്ന ചിത്രമായി തീർന്നിരിക്കുകയാണ്. നടി സാവിത്രിയുടെ മകൾ വിജയ ചാമുണ്ഡേശ്വരി കഴിഞ്ഞ ദിവസം വിജയവാഡയിലെ ക്യാപ്പിറ്റൽ സിനിമാസിൽ ചിത്രം കണ്ടതിന് ശേഷം വികാരാധീനയായിട്ടാണ് പത്രപ്രവർത്തകരെ അഭിസംബോധന ചെയ്‌തത്‌. ഷൂട്ടിംഗ് തുടങ്ങുന്നതിന് മുൻപ് തന്നെ തന്നോട് പറഞ്ഞത് പോലെ തന്നെയാണ് സംവിധായകനും നിർമാതാവും തന്റെ അമ്മയായ സാവിത്രിയെ സ്‌ക്രീനിൽ അവതരിപ്പിച്ചതെന്ന് വിജയ പറഞ്ഞു. മഹാനടിയുടെ യഥാർത്ഥ ജീവിതം ചിത്രത്തിലൂടെ തുറന്നു കാട്ടിയതിന് മുഴുവൻ ടീമിനും ആശംസകൾ അർപ്പിക്കുന്നതിനൊപ്പം കീർത്തി സുരേഷ്. ദുൽഖർ സൽമാൻ, സാമന്ത, വിജയ് ദേവരകൊണ്ട എന്നിവരെയും അഭിനന്ദിക്കാൻ അവർ മറന്നില്ല.ടീം മുഴുവനും ഒരു വെല്ലുവിളിയായിട്ടാണ് ചിത്രത്തെ ഏറ്റെടുത്തതെന്നും അമ്മയുടെ നടപ്പും ഭക്ഷണം കഴിക്കുന്ന രീതിയും എന്തിനേറെ കണ്ണ് ചിമ്മുന്നതും പോലെയുള്ള പല ചെറിയ ചെറിയ കാര്യങ്ങളും പോലും വളരെ സൂക്ഷ്മതയോടെയാണ് ചിത്രീകരിച്ചിരിക്കുന്നതെന്നും അവർ കൂട്ടിച്ചേർത്തു. അമ്മയെ നേരിട്ട് കാണുന്ന ഒരു ഫീലിങ്ങാണ് ചിത്രം തന്നതെന്നും വിജയ ചാമുണ്ഡേശ്വരി വെളിപ്പെടുത്തി.
