‘കാൽപാദത്തിൽ ചുംബിച്ചതിന് വരുന്ന വിമർശനങ്ങൾ പ്രത്യേക കേന്ദ്രത്തിൽ നിന്ന്, കോൺഗ്രസ് വിചാരിച്ചാൽ വാടിക്കരിഞ്ഞ് പോകുന്നയാളല്ല ഞാൻ’ – ഷൈജു ദാമോദരൻ

കഴിഞ്ഞദിവസം മുഴുവൻ സോഷ്യൽ മീഡിയയിൽ ഒരു ചുംബനവും ചുംബിച്ചയാൾ പറഞ്ഞ ഡയലോഗും ആണ് വൈറലായി മാറിയത്. കേരള ബ്ലാസ്റ്റേഴ്സ് താരം ഇവാൻ കലിയൂഷ്നിയുടെ കാൽപാദത്തിൽ ഷൈജു ദാമോദരൻ ചുംബിച്ചതാണ് ചിലരെ ചൊടിപ്പിച്ചത്. എന്നാൽ, ഇത് കേരളത്തിന്റെ മുഴുവൻ ചുംബനമാണെന്ന് പറഞ്ഞ് ഷൈജു ചുംബിച്ചതാണ് മറ്റു ചിലരെ ചൊടിപ്പിച്ചത്. ഏതായാലും ചുംബനവും പറഞ്ഞ ഡയലോഗും നിമിഷനേരം കൊണ്ട് വൈറലായി. സോഷ്യൽ മീഡിയ കമന്റേറ്റർ ഷൈജു ദാമോദരന് എതിരെ രൂക്ഷവിമർശനങ്ങൾ ഉയർന്നു. എന്നാൽ തനിക്ക് എതിരെ ഉയർന്ന വിമർശനത്തിൽ പ്രതികരിച്ചിരിക്കുകയാണ് ഷൈജു ദാമോദരൻ.

തനിക്കെതിരെയുള്ള വിമർശനങ്ങളെല്ലാം ഒരേതരം പ്രൊഫൈലിൽ നിന്നാണ് വരുന്നതെന്നും പ്രത്യേക കേന്ദ്രത്തിൽ നിന്നുള്ള സംഘടിതമായ ആക്രമണമാണ് നടക്കുന്നതെന്നും ഷൈജു ദാമോദരൻ പറഞ്ഞു. കോൺഗ്രസോ യൂത്ത് കോൺഗ്രസോ വിചാരിച്ചാൽ വാടിക്കരിഞ്ഞ് പോകുന്നയാളല്ല താനെന്നും മനോരമ ന്യൂസിനോട് സംസാരിക്കവെ ഷൈജു ദാമോദരൻ വ്യക്തമാക്കി. തനിക്കെതിരെ നടക്കുന്നത് പ്രത്യേക കേന്ദ്രത്തിൽ നിന്നുള്ള സംഘടിതമായ ആക്രമണമാണെന്നും അതിനൊക്കെ കാരണം തൃക്കാക്കര ഉപതെരഞ്ഞെടുപ്പിൽ താൻ ഒരു മുന്നണിക്ക് വേണ്ടി പരസ്യമായി രംഗത്തിറങ്ങിയത് ആണെന്നും ഷൈജു പറഞ്ഞു.

ഒരു മലയാളിയോടും തനിക്ക് വിരോധവും ദേഷ്യവുമില്ല. കോൺഗ്രസോ യൂത്ത് കോൺഗ്രസോ വിചാരിച്ചാൽ വാടിക്കരിഞ്ഞു പോകുന്നയാളല്ല താൻ. എതിർചേരിയിൽ നിന്ന് പുലഭ്യം പറയുന്നതിലൂടെ ആരെങ്കിലും സന്തോഷിക്കുന്നുണ്ടെങ്കിൽ അതിൽ താൻ ഹാപ്പിയാണ്. ഈ ജോലി ചെയ്യാൻ നിയുക്തനായിരിക്കുന്നിടത്തോളം കാലം ഇവിടെ ഉണ്ടാകുമെന്നും ഇതെല്ലാം പാർട് ഓഫ് ദ ഗെയിം ആണെന്നും ഷൈജു ദാമോദരൻ പറഞ്ഞു. താനൊരു സാധാരണ ഫുട്ബോൾ ആരാധകനാണ്. തന്നെ വിസ്മയിപ്പിച്ച രണ്ട് ഗോളുകൾ പിറന്നതിന്റെ സന്തോഷത്തിലാണ് ഇവാന്റെ ഇടതുകാലിൽ ചുംബിച്ചത്. ചുംബനം തെറ്റായി തോന്നിയിട്ടില്ലെന്നും അത് സ്നേഹത്തിന്റെയും വിശ്വാസത്തിന്റെയും ചിഹ്നമാണെന്നും അദ്ദേഹം പറഞ്ഞു.