മലയാളസിനിമയുടെ പ്രിയപ്പെട്ട യുവനായകൻ ഷെയിൻ നിഗം നായകനായി എത്തുന്ന ചിത്രം വേല റിലീസിന് ഒരുങ്ങുന്നു. നവംബർ പത്തിന് ചിത്രം റിലീസ് ചെയ്യും. അതേസമയം, ചിത്രത്തിലെ ഒരു ലിറിക്കൽ വീഡിയോ ഇന്ന് അണിയറപ്രവർത്തകർ പുറത്തു വിട്ടു. ‘പാതകൾ പലർ തെളിയാം മറയാം’ എന്ന ഗാനത്തിന്റെ ലിറിക്കൽ വീഡിയോ ആണ് റിലീസ് ചെയ്തത്. ടി സീരീസ് മലയാളത്തിന്റെ യുട്യൂബ് ചാനലിലൂടെയാണ് ഗാനം റിലീസ് ചെയ്തത്. നമ്രിത എം വി ആണ് ചിത്രത്തിൽ നായികയായി എത്തുന്നത്. ഷെയിൻ നിഗത്തിന് ഒപ്പം സണ്ണി വെയിനും ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കുന്നു.
എസ് ജോർജ് നിർമിക്കുന്ന ചിത്രം സംവിധാനം ചെയ്യുന്നത് ശ്യാം ശശിയാണ്. എം സജാസ് ആണ് തിരക്കഥ. പാതകൾ ഗാനത്തിന്റെ വരികൾ അൻവർ അലിയുടേതാണ്. സാം സി എസ് ആണ് സംഗീത സംവിധാനം. ചിത്രത്തിന്റെ ട്രയിലറിന് വലിയ സ്വീകരണമായിരുന്നു ലഭിച്ചത്. പൊലീസ് കൺട്രോൾ റൂമിന്റെ പശ്ചാത്തലത്തിലാണ് വേല കഥ പറയുന്നത്. ഉല്ലാസ് അഗസ്റ്റിൻ എന്ന പൊലീസ് ഉദ്യോഗസ്ഥനെ ഷെയിൻ അവതരിപ്പിക്കുമ്പോൾ മല്ലികാർജുനൻ എന്ന പൊലീസ് കഥാപാത്രത്തെ സണ്ണി വെയിൻ ആണ് അവതരിപ്പിക്കുന്നത്. സിദ്ധാർഥ് ഭരതനും ചിത്രത്തിൽ ശ്രദ്ധേയമായ പൊലീസ് കഥാപാത്രമായി എത്തുന്നു.
സിൻസിൽ സെല്ലുലോയ്ഡിന്റെ ബാനറിൽ എസ്.ജോർജ് ആണ് ചിത്രം നിർമ്മിക്കുന്നത്. വേലയുടെ ഓഡിയോ റൈറ്റ്‌സ് ടി സീരീസാണ് കരസ്ഥമാക്കിയത്. ബാദുഷ പ്രൊഡക്ഷൻസാണ് ചിത്രത്തിന്റെ സഹനിർമ്മാതാക്കൾ. നവംബർ 10നാണ് ചിത്രം കേരളത്തിലെ തിയറ്ററുകളിലേക്കെത്തുന്നത്.
