ഷറഫുദ്ദീൻ, അപർണ ദാസ്, നൈല ഉഷ എന്നിവർ പ്രധാനവേഷങ്ങളിൽ എത്തിയ ചിത്രമായ പ്രിയൻ ഓട്ടത്തിലാണ് ജിസിസിയിൽ റിലീസിന് എത്തി. ജി സി സി റിലീസിനായി ദുബായിൽ എത്തിയപ്പോഴുള്ള ചിത്രം നടൻ ഷറഫുദ്ദീൻ തന്റെ സോഷ്യൽ മീഡിയ അക്കൗണ്ടിലൂടെ പങ്കുവെച്ചു. ‘പ്രിയന്റെ ജി സി സി റിലീസിനായി ദൂബായിൽ’ എന്ന അടിക്കുറിപ്പോടെയാണ് ദുബായിൽ നിന്നുള്ള തന്റെ ചിത്രങ്ങൾ ഷറഫുദ്ദീൻ പങ്കുവെച്ചത്.
ജീവിതത്തിൽ ഓരോരോ ജോലികളിൽ ഏർപ്പെട്ട് സദാ ഓടിക്കൊണ്ടിരിക്കുന്ന ഒരു ചെറുപ്പക്കാരന്റെ ജീവിതമാണ് ‘പ്രിയൻ ഓട്ടത്തിലാണ്’ എന്ന സിനിമ പറയുന്നത്. മലയാളത്തിന്റെ പ്രിയനടൻ മമ്മൂട്ടി ചിത്രത്തിൽ അതിഥിവേഷത്തിൽ എത്തുന്നു എന്ന പ്രത്യേകതയും ഉണ്ട്. ചിത്രത്തിലെ പ്രധാനപ്രമേയം പ്രിയന്റെ ജീവിതത്തിലെ ഒരു പ്രധാനപ്പെട്ട ദിവസമാണ്. ആ ദിവസം പ്രിയൻ തന്റെ പതിവുശീലങ്ങൾ ഉപേക്ഷിക്കുമോ ഇല്ലയോ എന്നുള്ളതാണ് ചിത്രത്തിൽ വ്യക്തമാക്കുന്നത്.
ബിജു സോപാനം, ഹക്കിം ഷാജഹാൻ, സുധി കോപ്പ, ജാഫർ ഇടുക്കി, സ്മിനു സിജോ, അശോകൻ, ഹരിശ്രീ അശോകൻ, ഷാജു ശ്രീധർ, ശിവം സോപാനം, ഉമ, ജയരാജ് കോഴിക്കോട്, വീണ, വിജി, വിനോദ് തോമസ്, ശ്രീജ ദാസ്, വിനോദ് കെടാമംഗലം, കുക്കിൽ രാഘവൻ, ഹരീഷ് പെങ്ങൻ, അനാർക്കലി മരക്കാർ എന്നിവരാണ് ചിത്രത്തിലെ പ്രധാന താരങ്ങൾ. ‘ചതുർമുഖ’ത്തിന് ശേഷം അഭയകുമാർ കെ, അനിൽ കുര്യൻ എന്നിവർ ഒന്നിച്ചു തിരക്കഥയും സംഭാഷണവുമെഴുതുന്ന ചിത്രമാണ് പ്രിയൻ ഓട്ടത്തിലാണ്. സൈറ ബാനുവിന് ശേഷം ആന്റണി സോണി സംവിധാനം ചെയ്യുന്ന ചിത്രമാണ്. ശബരീഷ് വർമ, പ്രജീഷ് പ്രേം, വിനായക് ശശികുമാർ എന്നിവരാണ് പാട്ടുകൾ എഴുതിയിരിക്കുന്നത്.
View this post on Instagram
