പൃഥ്വിരാജിനെ നായകനാക്കി ഷാജി കൈലാസ് സംവിധാനം ചെയ്ത ചിത്രമാണ് കടുവ. മികച്ച പ്രതികരണമാണ് ചിത്രത്തിന് തീയറ്ററുകളില്‍ ലഭിച്ചത്. ചിത്രത്തിലെ പാലാപ്പള്ളി തിരുപ്പള്ളി എന്ന ഗാനം സോഷ്യല്‍ മീഡിയയില്‍ അടക്കം വൈറലായിരുന്നു. സന്തോഷ് വര്‍മ്മയും ശ്രീഹരി തറയിലും ചേര്‍ന്നാണ് ഗാനത്തിന്റെ വരികള്‍ ചിട്ടപ്പെടുത്തിയിരിക്കുന്നത്. സോള്‍ ഓഫ് ഫോക്ക് എന്ന ടീമീന്റേതാണ് ഗാനത്തിന്റെ യഥാര്‍ത്ഥ സംഗീതം.
View this post on Instagram
ഇപ്പോഴിതാ ഈ ഗാനത്തിന് ചുവടുവച്ച് രംഗത്തെത്തിയിരിക്കുകയാണ് നടിമാരായ ഷീലു എബ്രഹാമും നിത പ്രോമിയും. മുണ്ടും ഷര്‍ട്ടുമിട്ടാണ് ഇരുവരും ഡാന്‍സ് കളിക്കുന്നത്. ഇരുവരുടേയും ഡാന്‍സ് വിഡിയോ വൈറലായിട്ടുണ്ട്. ആടുപുലിയാട്ടം, പുതിയ നിയമം, സ്റ്റാര്‍ എന്നീ ചിത്രങ്ങളിലൂടെ പ്രേക്ഷകര്‍ക്ക് സുപരിചിതയായ നടിയാണ് ഷീബു എബ്രഹാം. ചലച്ചിത്ര നിര്‍മാതാവ് കൂടിയാണ് ഷീബു. ടെലിവിഷനിലും സിനിമയിലും പ്രേക്ഷകര്‍ക്ക് സുപരിചിതയാണ് നിത പ്രോമി.
അതേസമയം, 50 കോടി ക്ലബ്ബില്‍ ഇടംനേടിയിരിക്കുകയാണ് കടുവ. പൃഥ്വിരാജും ഷാജി കൈലാസും തന്നെയാണ് ഇക്കാര്യം അറിയിച്ചത്. കടുവയെ പ്രേക്ഷകര്‍ സ്വീകരിച്ചതിന് ഇരുവരും നന്ദി പറയുകയും ചെയ്തു. ആദ്യ നാല് ദിനങ്ങളില്‍ മാത്രം 25 കോടി രൂപയാണ് കടുവ നേടിയത്. പൃഥ്വിരാജിന്റെ കരിയറിലെ ഏറ്റവും മികച്ച ഓപ്പണിംഗ് കളക്ഷന്‍ ആയിരുന്നു ഇത്. തീയറ്ററുകളില്‍ കടുവയ്ക്ക് മികച്ച പ്രതികരണമായിരുന്നു ലഭിച്ചത്. ഷാജി കൈലാസ് എന്ന സംവിധായകന്റെ ഗംഭീര തിരിച്ചുവരവാണ് ചിത്രമെന്നാണ് പ്രേക്ഷകര്‍ ഒന്നടങ്കം പറഞ്ഞത്. പൃഥ്വിരാജിന്റെ കട്ട മാസ് പ്രകടനവും സിനിമാസ്വാദകരെ ത്രസിപ്പിച്ചു.
