അവതാരകയായി മലയാളിക്ക് സുപരിചിതയാണ് ശില്‍പ ബാല. കുറേ നാളുകളായി സ്‌ക്രീനില്‍ നിന്ന് വിട്ടുനില്‍ക്കുകയാണ് താരം. എന്നാല്‍ സോഷ്യല്‍ മീഡിയയില്‍ താരം സജീവമാണ്. യൂട്യൂബ് ചാനലിലൂടെ പ്രേക്ഷകരുമായി സംവദിക്കുന്ന ശില്‍പ മകള്‍ക്കും ഭര്‍ത്താവിനുമൊപ്പമുള്ള വിഡിയോയും പങ്കുവയ്ക്കാറുണ്ട്. ഇപ്പോഴിതാ മുഖത്ത് ചെയ്ത സര്‍ജറിയെപ്പറ്റിയും മറ്റും തുറന്നു പറയുകയാണ് താരം.
മകളുമൊന്നിച്ച് എത്തിയ വിഡിയോയില്‍, ശില്‍പയോട് മകളാണ് ഡോക്ടറെക്കുറിച്ച് പറയാന്‍ പറയുന്നത്. മുഖക്കുരു എങ്ങനെയെല്ലാം വരുമെന്ന് ശില്‍പ മകളോട് ചോദിക്കുമ്പോള്‍, മേക്കപ്പ് അധികം ഇട്ടാലും, ജങ്ക് ഫുഡ് കഴിച്ചാലും മുഖക്കുരു വരുമെന്നാണ് മകള്‍ പറയുന്നത്. ഇതിന് ശേഷം മുഖക്കുരു തനിക്ക് എങ്ങനെയാണ് പ്രശ്‌നമായതെന്നും അതിന് എടുത്ത ട്രീറ്റ്‌മെന്റിനെക്കുറിച്ചും ശില്‍പ പറയുന്നുണ്ട്
ആദ്യമായി മുഖക്കുരു വന്നപ്പോള്‍ പ്രായത്തിന്റെ ഭാഗമായി എല്ലാവര്‍ക്കും വരുന്നതുപോലെ വന്നതാണെന്നാണ് കരുതിയതെന്ന് ശില്‍പ പറയുന്നു. എന്നാല്‍ കുറച്ച് കഴിഞ്ഞതോടെ കുറച്ച് അധികമായി വരാന്‍ തുടങ്ങി. ആ സമയത്ത് ദുബൈയില്‍ ചില ഷോകള്‍ ചെയ്യാറുണ്ടായിരുന്നു. അപ്പോള്‍ ക്യാമറയില്‍ കുരു കിട്ടാതിരിക്കാന്‍ കൂടുതല്‍ മേക്കപ്പ് ചെയ്യേണ്ടിവന്നു. അങ്ങനെയങ്ങനെ ആത്മവിശ്വാസം ഏറക്കുറെ മുഴുവനായും നഷ്ടമായി. മാനസികമായും ചില പ്രശ്നങ്ങളെല്ലാം ഇതിന്റെ ഭാഗമായി വന്നു. അങ്ങനെയാണ് ഡോക്ടറെ കാണുന്നതും ട്രീറ്റ്‌മെന്റ് എടുത്തതും. അതിന് ശേഷം പ്രശ്‌നങ്ങള്‍ ഏറെക്കുറേ മാറിയെങ്കിലും സ്‌കിന്‍ പ്രശ്‌നങ്ങളുണ്ടായി. അതോടെയാണ് സര്‍ജറി ചെയ്യാന്‍ തീരുമാനിച്ചതെന്നും ശില്‍പ പറയുന്നു.
