‘പറഞ്ഞാൽ മനസിലാകാത്തവരുടെ അടുത്തു നിന്നിട്ട് കാര്യമില്ലല്ലോ’; മാധ്യമപ്രവർത്തകരെ കണ്ട് തിയറ്ററിൽ നിന്ന് ഓടിയ സംഭവത്തിൽ ഷൈൻ ടോം ചാക്കോ

യുവനായകൻ ടോവിനോ തോമസിനെ നായകനാക്കി ഖാലിദ് റഹ്മാൻ സംവിധാനം ചെയ്യുന്ന ചിത്രം ‘തല്ലുമാല’ റിലീസിന് ഒരുങ്ങുകയാണ്. കല്യാണി പ്രിയദർശൻ ആണ് ചിത്രത്തിൽ നായികയായി എത്തുന്നത്. ചിത്രത്തിലെ പാട്ടുകളെല്ലാം സമൂഹമാധ്യമങ്ങളിൽ തരംഗമായിരിക്കുകയാണ്. സിനിമയിൽ ഷൈൻ ടോം ചാക്കോയും ഒരു പ്രധാനവേഷത്തിൽ എത്തുന്നുണ്ട്. ഒപ്പം ലുക്മാൻ അവറാൻ, ചെമ്പൻ വിനോദ് ജോസ്, തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.

‘തല്ലുമാല’ ചിത്രത്തിന്റെ പ്രമോഷനുമായി ബന്ധപ്പെട്ട് ഷൈൻ ടോം ചാക്കോ ജിഞ്ചർ മീഡിയയ്ക്ക് നൽകിയ അഭിമുഖമാണ് ഇപ്പോൾ ശ്രദ്ധേയമാകുന്നത്. തിയറ്ററിൽ സിനിമ കണ്ടിറങ്ങിയ ഷൈനിനെ തേടി പ്രതികരണം ആരാഞ്ഞ മാധ്യമപ്രവർത്തകരെ കണ്ട് തിയറ്ററിൽ നിന്ന് ഇറങ്ങിയോടിയ സംഭവത്തെക്കുറിച്ച് വിശദമാക്കുകയാണ് ഷൈൻ ടോം ചാക്കോ. ഈ വീഡിയോ സാമൂഹ്യമാധ്യമങ്ങളിൽ വൈറലായിരുന്നു.

പറഞ്ഞാല്‍ മനസിലാകാത്തവരുടെ അടുത്ത് നിന്നിട്ട് കാര്യമില്ലെന്നും അതുകൊണ്ടാണ് ഓടിയതെന്നുമാണ് സംഭവത്തെക്കുറിച്ച് അദ്ദേഹം പ്രതികരിച്ചത്. ‘പറഞ്ഞാ മനസിലാകാത്തവരുടെ അടുത്ത് നിന്നിട്ട് കാര്യമില്ലല്ലോ.. ഓടണം. ഓടി ഒളിക്കാനൊന്നുമല്ല, രക്ഷപ്പെടാനാണ് ഓടിയത്.’ – ഷൈൻ ടോം ചാക്കോ പറഞ്ഞു. ‘ആദ്യം തിയറ്ററില്‍ ഒരു റൗണ്ട് ഓടി. ഇവരൊക്കെ കൂടെ ഓടി. ഓട്ടം കൂടുന്തോറും ആള്‍ക്കാരുടെ എണ്ണം കുറഞ്ഞു തുടങ്ങി. അപ്പോ ഞാന്‍ സ്‌ക്രീനില്‍ കയറി ഇരുന്നു. അവിടെ ഷൂട്ട് ചെയ്യാന്‍ പറ്റില്ലല്ലോ. എല്ലാവരും കിതപ്പിലാണ്. കിതപ്പ് മാറിയപ്പൊ ഞാന്‍ അവിടെന്നും ഓടി. അപ്പോഴാണ് ആ ഗ്രില്ലിന്റെ ഉള്ളില്‍ പെടുന്നത്. ഞാന്‍ വിചാരിച്ചു അവരോട് സംസാരിക്കാമെന്ന്. പിന്നെ ഓര്‍ത്തു വേണ്ട. വീണ്ടും ആ വയ്യാത്ത കാലും വെച്ച് ഓടി,’ – ഷൈന്‍ ടോം ചാക്കോ പറയുന്നു. ഓഗസ്റ്റ് 12നാണ് തല്ലുമാല റിലീസ് ചെയ്യുന്നത്.