മലയാളികളുടെ സ്വകാര്യ അഹങ്കാരമാണ് നടന്‍ മോഹന്‍ലാല്‍. 1980 ല്‍ മഞ്ഞില്‍ വിരിഞ്ഞ പൂക്കള്‍ എന്ന ചിത്രത്തില്‍ തുടങ്ങിയതാണ് മോഹന്‍ലാലിന്റെ യാത്ര. നടനായും ഗായകനായും നിര്‍മാതാവായും ഇപ്പോഴിതാ സംവിധായകനുമായിരിക്കുകയാണ് മോഹന്‍ലാല്‍. ബി. ഉണ്ണികൃഷ്ണന്‍ സംവിധാനം ചെയ്ത ആറാട്ടാണ് മോഹന്‍ലാലിന്റേതായി ഒടുവില്‍ പുറത്തിറങ്ങിയ ചിത്രം. അബിനയും സംവിധാനവും ഇപ്പോള്‍ ഒരുമിച്ച് കൊണ്ടുപോകുകയാണ് താരം. ഇതിനിടെ മോഹന്‍ലാലിന്റെ ഒരു വിഡിയോ പങ്കുവച്ചിരിക്കുകയാണ് ഗായകന്‍ എം.ജി ശ്രീകുമാര്‍.
മോഹന്‍ലാലും പ്രേംനസീറും എം.ജി ശ്രീകുമാറുമാണ് വിഡിയോയിലുള്ളത്. വര്‍ഷങ്ങള്‍ക്ക് മുമ്പ് വിദേശത്ത് നടന്ന സ്റ്റേജ് ഷോയുടെ വിഡിയോയാണിത്. അധികമാരും ഈ വിഡിയോ കണ്ടിട്ടില്ല. പരിപാടിയില്‍ പാട്ട് പാടാനായി മോഹന്‍ലാലിനെ നസീര്‍ വേദിയിലേക്ക് ക്ഷണിക്കുന്നതും മോഹന്‍ലാല്‍ പാടുന്നതുമാണ് വിഡിയോയില്‍.
‘പാട്ട് പാടാന്‍ കഴിവുള്ള സൂപ്പര്‍ സ്റ്റാര്‍’ എന്ന് അഭിസംബോധന ചെയ്തു കൊണ്ടായിരുന്നു നസീര്‍ മോഹന്‍ലാലിനെ വേദിയിലേയ്ക്ക് ക്ഷണിച്ചത്. ‘നീയറിഞ്ഞോ മേലെ മാനത്ത്’ എന്ന പാട്ടാണ് മോഹന്‍ലാലും ശ്രീകുമാറും ചേര്‍ന്ന് വേദിയില്‍ പാടിയത്. സിനിമയില്‍ മോഹന്‍ലാലും മാള അരവിന്ദനും ചേര്‍ന്നായിരുന്നു ഈ ഗാനം ആലപിച്ചത്.
