ആരാധകർ ആകാംക്ഷയോടെ കാത്തിരുന്ന ചിത്രമാണ് സി ബി ഐ സീരീസിലെ അഞ്ചാമത് ചിത്രമായ ‘സിബിഐ 5 ദ ബ്രയിൻ’. മെയ് ഒന്നാം തീയതി ഞായറാഴ്ചയാണ് ചിത്രം തിയറ്ററുകളിൽ റിലീസ് ചെയ്തത്. ചിത്രത്തിന് മികച്ച അഭിപ്രായമാണ് ലഭിച്ചു കൊണ്ടിരിക്കുന്നത്. ചിത്രം റിലീസ് ചെയ്ത് മണിക്കൂറുകൾക്കുള്ളിൽ ചിത്രത്തന്റെ സക്സസ് പാർട്ടി നടത്തിയിരിക്കുകയാണ് അണിയറപ്രവർത്തകർ. സംവിധായകനായ ഷാജി കൈലാസ് ആണ് സോഷ്യൽ മീഡിയയിൽ സക്സസ് പാർട്ടിയുടെ ചിത്രങ്ങൾ പോസ്റ്റ് ചെയ്തത്. കെ മധുവും എസ് എൻ സ്വാമിയും ചേർന്ന് കേക്ക് മുറിക്കുന്നതിന്റെ ചിത്രമാണ് പങ്കുവെച്ചത്. നിരവധി ആരാധകർ ചിത്രത്തിന് ലൈക്കും കമന്റുമായി എത്തിയിട്ടുണ്ട്.
എസ് എൻ സ്വാമിയുടെ തിരക്കഥയിൽ കെ മധു ആണ് സി ബി ഐ അഞ്ചാം ഭാഗം സംവിധാനം ചെയ്തത്. സ്വര്‍ഗചിത്ര നിര്‍മിച്ച സിനിമയ്ക്ക് അഖില്‍ ജോര്‍ജ് ആണ് ക്യാമറ ചലിപ്പിച്ചത്. ശ്രീകര്‍ പ്രസാദ് എഡിറ്റിംഗും ജേക്‌സ് ബിജോയ് മ്യൂസിക്കും നിര്‍വഹിച്ചു. 3 വർഷം കൊണ്ടാണ് എസ് എൻ സ്വാമി സിബിഐയുടെ അഞ്ചാം ഭാഗത്തിന്റെ തിരക്കഥ പൂർത്തിയാക്കിയത്. ചിത്രത്തിലെ മമ്മൂട്ടിയുടെ ലുക്ക് നേരത്തെ തന്നെ ആരാധകർ ഏറ്റെടുത്തിരുന്നു. 130നടുത്ത് ദിവസമെടുത്താണ് ചിത്രീകരണം പൂര്‍ത്തിയാക്കിയത്.
ലോക സിനിമാ ചരിത്രത്തില്‍ തന്നെ ആദ്യമായാണ് ഒരേ സംവിധായകനും തിരക്കഥാകൃത്തും നടനും ഒരു സിനിമയുടെ അഞ്ചാം ഭാഗത്തിനായി വര്‍ഷങ്ങൾക്ക് ശേഷം ഒന്നിക്കുന്നത്. സംവിധായകനും തിരക്കഥാകൃത്തിനും നായകനും ഒഴികെ മറ്റാര്‍ക്കും കഥയുടെ പൂര്‍ണരൂപം അറിയില്ല. സസ്‌പെന്‍സ് നിലനിര്‍ത്തിയാണ് ചിത്രീകരണം പൂര്‍ത്തിയാക്കിയത്. കാലത്തിനൊത്തുള്ള സാങ്കേതികവിദ്യയും സേതുരാമയ്യരും ചേരുമ്പോള്‍ ചിത്രത്തെക്കുറിച്ചുള്ള പ്രതീക്ഷകള്‍ വര്‍ദ്ധിക്കുകയാണ്. മമ്മൂട്ടി – കെ മധു- എസ് എൻ സ്വാമി കൂട്ടുകെട്ടിൽ 1988ലാണ് സിബിഐ സീരിസിലെ ആദ്യചിത്രമായ ഒരു സിബിഐ ഡയറികുറിപ്പ് പുറത്തിറങ്ങുന്നത്. പിന്നീട് ജാഗ്രത, സേതുരാമയ്യര്‍ സിബിഐ, നേരറിയാന്‍ സിബിഐ എന്നീ ചിത്രങ്ങളും പുറത്തെത്തി. ആശ ശരത്താണ് മമ്മൂട്ടിയുടെ നായികയായി എത്തുന്നത്. മുകേഷും ജഗതി ശ്രീകുമാറും ചിത്രത്തിൽ ഉണ്ട്. വർഷങ്ങൾക്ക് ശേഷമാണ് വീണ്ടും ജഗതി ശ്രീകുമാർ ക്യാമറയ്ക്ക് മുന്നിൽ എത്തുന്നത്. കൂടാതെ സായ് കുമാർ, രഞ്ജി പണിക്കർ, അനൂപ് മേനോൻ, ദിലീഷ് പോത്തൻ, മുകേഷ്, രമേഷ് പിഷാരടി, ആശ ശരത്, സുദേവ് എന്നു തുടങ്ങി ഒരു വലിയ താരനിരയാണ് വിവിധ കഥാപാത്രങ്ങളായി എത്തുന്നത്.
View this post on Instagram
